Aqtóbede náresteler kózine ota jasaıtyn jalǵyz maman bar
K.Meshıtbaeva 2001 jyly Marat Ospanov atyndaǵy Batys Qazaqstan memlekettik medıtsına akademııasyna qujattaryn Oral qalasynda tapsyrǵan. Sol jerde emtıhan tapsyryp, memlekettik grant ıegeri atandy. Al 2007 jyly pedıatr mamandyǵyn alyp, ınternatýraǵa tústi. Taǵy bir jyl oqyp, bilimin jetildirdi. Jalpy, 5-kýrstan bastap sportshylarǵa arnalǵan dıspanserde dáriger boldy. Dáriger sportshylardy medıtsınalyq tekserýden ótkizip, em-dom júrgizdi. Jas aqtóbelikterdi jarysqa daıyndady. Al ınternatýra qujaty qolǵa tıgen soń Hromtaý aýdanynyń Aqjar aýylyna attandy. Mundaǵy dárigerlik ambýlatorııada 4 jyl pedıatr bolyp eńbek etti. 2013 jyldan bastap jalpy tájirıbelik dáriger atandy. 2017 jyly oblystyq perınataldyq ortalyqqa aýysty. Qazir de osy ortalyqta neonatolog-oftalmolog bolyp eńbek etedi. Ár jańa qyzmetke aýysqanda biliktiligin arttyryp, arnaıy sertıfıkat ıelendi.
«Qazir aıy-kúni jetpeı bosanyp qalatyn analar kóbeıdi. Ortalyqta jylyna shamamen 7500 áıel bosansa, onyń 5% sábıin erte ómirge ákeledi. Tehnologııa damyǵan zamanda shaqalaqtyń ómir súrip ketý kórsetkishi joǵary. Biraq em júrgiziledi, dárigerler baqylaýynda bolady. Ókpe damymaıdy, júreginde sańylaý bolyp, kózi aýyrady, mıy jetilmeıdi. Máselen 30-aptada ómirge kelse, 38-aptaǵa jetkenshe túrli qıyndyqqa kezigedi. Sábı kógerip, emýi nasharlaıdy. Keıde tútikshe arqyly tamaqtanady. Qospa da ishýine týra keledi. Іshekteri sol kezde shydamaı, isip ketedi. Osynyń bári bizdiń baqylaýymyzda bolady», - dedi Kamshat Meshıtbaeva.
Qazir neonatolog maman retinde 33 balanyń densaýlyǵyna jaýapty. Qaı kúni, qansha aptada ómirge kelgeni arnaıy kitapshada jazýly tur. Al otyz aptalyq sábıdiń barlyǵynyń kózin arnaıy qurylǵymen tekseredi. Sol kezde ekinshi mamandyǵyna kirisedi.
«Qazir 24 aptalyq, salmaǵy 500 gramm bolatyn sábıler de ómirge kelip jatyr. Bala ómirge erte kelse, soǵurlym retınopatııa, ıaǵnı kóz aýrýyna shaldyǵady. Bul dıagnozdyń bes deńgeıi bar. Birinshi jáne ekinshi deńgeıdi qadaǵalaımyz. Al eger bir, ekiden ótip, úshke aýyssa, ota jasalady. Eger ota jasalmasa, kózi óte nashar kóredi, tipti kór soqyr bolyp qalady. Naqtylasam, bala 30-aptada nemese odan da az ýaqytta ómirge kelse, arada úsh apta ótýi tıis. Al 34-aptada ómirge kelse, bir aptadan keıin kózin tekseremin. Oftalmoskopııany kıip, lýpamen qaraımyn. Arnaıy dári tamyzǵan kezde qarashyq úlkeıedi. Sol kezde tekserý tıimdi. Kóbine konıýktıvıt, ıaǵnı kózdiń dáneker qabyǵynyń qabynýy, retınopatııa aýrýy kezdesedi. Shala týǵan balada osy retınopatııa anyqtalady. Olardyń kóz tamyrlary durys jetilmeıdi. Shaqalaqqa dybys, aýa, jaryqtyń bári keri áserin tıgizedi. Sondyqtan balany arnaıy apparatqa salyp, anasynyń jatyrynda jatqandaı áser berý úshin jan-jaǵyn qorshap qoıamyz. Al eger aýa jetpese, ókpeni jasandy jeldetý apparatyna qosylady», - dedi oftalmolog.
Bıyl tamyz aıynda Aqtóbege «Aıala» qory lazerlik apparatty syıǵa tartty. Oblystyq perınataldy ortalyqtaǵy jańa qural Astana men Almatyda jasalatyn otany jergilikti jerde jasaýǵa múmkindik beredi. Kamshat Meshıtbaeva naýryz aıynda Reseıdiń Sankt-Peterbýrg qalasyna baryp, lazerlik mıkrohırýrgııa salasyn meńgerdi. Keıin Almatydaǵy bilikti maman Ásel Sháripova óz nusqaýymen apparat alýǵa yqpal etti. Tamyzda jetkizilgen qurylǵy bir aıdan soń kádege jaraı bastady. Bıyl qyrkúıekte aqtóbelik maman alǵashqy otany jasady. Bir ózi bar jaýapkershilikti moınyna aldy. Alǵashqy ota 4 saǵatqa sozyldy.
«Ómirge kelgen balalarda kóz aýrýy bolsa, joldamamen osy aýrýhanaǵa jiberedi. Biraq balalardy 42 aptaǵa deıingi ǵana baqylaýǵa alamyn. Retınopatııa – shala týǵan nárestelerde jıi kezdesedi. Degenmen ózge balalarda da bolýy múmkin. Ony bir qarap, anyqtaý, ajyratý múmkin emes. Sondyqtan oblys úshin bir ǵana mamannyń osy salaǵa mashyqtanǵany azdyq etedi. Oqımyn, salany meńgeremin degen jastardy kórmedim. Ota – zergerlik sheberlik. Bir orynda tapjylmaı 4 saǵat shydaý kerek. Lazer qosýly kezde shalt qımyldasaq, kúıdirip te jiberemiz. Bul sala nege aq halattylardy qyzyqtyrmaıdy? Sebebi aqshasy múlde joq desek te bolady. Bar bolǵany 0,25 saǵat esepteledi. Qalǵanyn ózińiz esepteı berińiz», - dedi dáriger.
Aıta keteıik, oblystyq perınataldy ortalyqta 2022 jyly úsh úshem ómirge keldi. Onyń bireýi jasandy uryqtandyrý baǵdarlamasynyń jemisi.
