Aqtóbede mereke kúnderi kimder jumys isteıdi
AQTÓBE. KAZINFORM – Aqtóbede Jańa jyl merekesi kúnderi polıtsııa, tótenshe jaǵdaılar qyzmeti men medıtsına mamandary kezekshilikpen jumys isteıdi. Sonymen birge áskerıler de qoǵamdyq qaýipsizdikti qamtamasyz etedi.
Aqtóbede mereke kezinde qaýipsizdikti uıymdastyrý jáne qamtamasyz etý máseleleri jóninde jıyn ótti.
Qala ákimi Azamat Bekettiń aıtýynsha, 31 jeltoqsan kúni saǵat 20:00-22:00 aralyǵynda qalalyq mádenıet úıiniń alańynda, birqatar turǵyn úı alaptary men saıabaqtarda merekelik baǵdarlama ótedi. Al saǵat 21:00-1:00 aralyǵynda «Qazaqstan halqyna myń alǵys» stellasynyń janyndaǵy alańda kontsert uıymdastyrylady. Polıtsııa departamenti bastyǵynyń birinshi orynbasary Ardana Saımaǵambetovtyń aıtýynsha, quqyqtyq tártip pen qaýipsizdikti qamtamasyz etý úshin 31 jeltoqsan men 7 qańtar aralyǵynda polıtsııanyń barlyq jeke quramy kúsheıtilgen tártipte jumys isteıdi.
- 640 polıtsııa qyzmetkeri, Ulttyq ulannyń 665 áskerı qyzmetkeri jáne rezervtiń 308 qyzmetkeri jumyldyryldy. Qoǵamdyq oryndarda patrýldeý júrgiziledi. Mas kúıinde kólikti basqarýǵa jol bermeý, ózge de buzýshylyqtardyń aldyn alýǵa basa nazar aýdarylady. Qalalar men aýdandardyń ákimdikterimen birlesip, tótenshe jaǵdaılardyń aldyn alý úshin is-sharalar jospary ázirlendi. Barlyǵy 668 nysan tekserildi. Onyń ishinde 450 buzýshylyq joıyldy. Pırotehnıkanyń ruqsatsyz saýdasy boıynsha turaqty reıdter júrgizilip jatyr. 24 quqyq buzýshy jaýapqa tartyldy,- dep habarlady Aqtóbe oblysy ákiminiń baspasóz qyzmeti.
Sonymen birge 31 jeltoqsan men 5 qańtar aralyǵynda TJD qyzmetkerleri de kúsheıtilgen rejımde jumys isteıdi. Jeke quramnyń 105 qyzmetkeri jáne 23 tehnıkasy jumyldyryldy.
- Jappaı is-sharalarda, saýda ortalyqtary, alańdar men saıabaqtardy qosa alǵanda adamdar kóp jınalatyn jerlerde qaýipsizdik sharalaryn kúsheıtý kerek. Aýdandarda turaqty patrýldeýdi uıymdastyrý qajet. Adamdar kóp shoǵyrlanatyn obektilerde qosymsha profılaktıkalyq tekserýler júrgizý, órt qaýipsizdigine erekshe nazar aýdarý kerek. Strategııalyq obektiler men buqaralyq is-sharalar ótkiziletin oryndardyń kúzetin qamtamasyz etý, barlyq qyzmetterdiń jumysyn baqylaýda ustaý mańyzdy», - dedi Aqtóbe oblysynyń ákimi Ashat Shaharov.
Aıta keteıik, Jańa jyl merekesi kúni 52 jedel járdem brıgadasy kezekshilik etedi. «103» dıspetcherlik qyzmetinde qosymsha baılanys jelileri jumys isteıdi. Travmatologııa pýnktteri únemi ashyq turady. Qan men plazma qory daıyndaldy.