Aqtóbede mekteptegi sharýashylyq bólmesiniń qabyrǵasy sógilip ketti
Aqtóbe oblysy Temir aýdany Keńqııaq aýylyndaǵy mektep 2012 jyly salynyp, qoldanysqa berildi. 600 oryndy bilim ordasynda qazir 1200 bala bilim alyp júr.
Mundaǵy sharýashylyq bólmesiniń qabyrǵasy sógilip ketip, ata-analar balalarynyń ómirine alańdap otyr.
Oblystyq bilim basqarmasy osy jaıtqa túsinik berdi.
«Jańbyr sýy kezinde mekteptegi qosymsha sharýashylyq bólmesinde jylý jáne sý qubyrlary ornalasqan qosalqy bólmeniń qabyrǵasy sógilip ketti. ıAǵnı, qosalqy qabyrǵa negizgisinen ajyraǵan. Bul tirek qabyrǵa emes. Ol kezde mektepte bala bolmady. Qabyrǵany sol boıda alyp tastap, bólý jumystaryna plastıkalyq qabyrǵa qoldanylyp jatyr. Áleýmettik jelidegi pablıkterde shyndyqqa janaspaıtyn aqparat tarap jatyr. «Dala kórinip tur» deıdi. Biraq ol ótirik. Qazirgi kezde arnaıy komıssııa quryldy. Onyń quramynda oblystyq bilim, qurylys basqarmalary men oblystyq memlekettik sáýlet-qurylys basqarmasynyń mamandary bar. Olar mekteptiń tehnıkalyq jaǵdaıyn qarap, saraptama jasaıdy. Sodan keıin ǵana naqty jaǵdaı belgili bolady. Eger mektep balalar bilim alýǵa jaramsyz bolsa, ol jerge oqýǵa jibermeımiz», - dedi oblystyq bilim basqarmasy basshysynyń mindetin atqarýshy Nurgúl Bertileýova.
Onyń aıtýynsha, buǵan deıin mektepte dál osyndaı jaǵdaı bolmaǵan.
Aıta keteıik, aýylda halyq ósimi bar. «Jaıly mektep» jobasy aıasynda 300 oryndy mektep salynady.
Qurylys 2024 jyly bastalyp, 2025 jyly aıaqtalady.
Foto: Aqtóbe oblystyq bilim basqarmasy
