Aqtóbede mektep avtobýsyn júrgizetin mamandar tapshy
AQTÓBE. KAZINFORM — Aqtóbe oblysynda 145 mektep avtobýsy paıdalanylady. Avtobýstaǵy 34 júrgizýshi — zeınetker.
Júrgizýshilerge qajettilik bar — basqarma
Aqtóbe oblysynda qazirgi kezde 12 700-den astam oqýshy kún saıyn mektepke avtobýspen barady.
Olardyń biri qashyqta tursa, endi biri oryn tapshylyǵynan úıiniń janyndaǵy bilim ordasyna bara almaıdy. Myńdaǵan balany tasymaldaý úshin 145 avtobýs paıdalanylyp júr.
Onyń 53-i mekteptiki bolsa, qalǵany jaldamaly. Aqtóbe oblystyq bilim basqarmasy baspasóz qyzmetiniń habarlaýynsha, júrgizýshilerdiń tórtten biri zeınetkerler.
— Avtobýs júrgizýshileriniń jas erekshelikteri: 20-30 jas — 1, 30-40 jas — 13, 40-50 jas — 28, 50-60 jas — 51, 60-63 jas — 22, 63 jastan joǵary — 34. Avtobýs júrgizýshileri sanatynyń ereksheligine, jalaqy tómendigine baılanysty mamandarǵa qajettilik baıqalyp otyr. Osy qajettilikti sheshý maqsatynda Eńbek kodeksiniń normalarynyń negizinde zeınet jasyna tolǵan júrgizýshiler jumysqa tartylyp, olarmen eńbek kelisimsharttary uzartylyp otyr. Qazirgi tańda zeınet jasyna tolǵan 34 júrgizýshi jumys isteıdi. Jumysqa qabyldanbas buryn qyzmetkerlerdiń densaýlyq jaǵdaıy tekserilip, jumys isteýge qabilettiligin rastaıtyn ruqsatnama alynady. Sonymen qatar qyzmetkerlerdiń kúndelikti reıs aldyndaǵy densaýlyq jaǵdaıy da qaralady, — dep habarlady Aqtóbe oblystyq bilim basqarmasy baspasóz qyzmeti.
Mektep avtobýsyn aıdaıtyn júrgizýshilerdiń eńbekaqysy eńbek ótili men razrıady boıynsha tólenedi.
Mektep avtobýsyn júrgizýge jastar kele bermeıdi — zeınetker ári júrgizýshi
Aqtóbe qalasyndaǵy № 50 mektepke birneshe saıajaı aýmaǵynda turatyn balalar tasymaldanady.
Júrgizýshi tańerteń, túske, keshke oqýshylardy arnaıy belgilengen orynnan alyp ketip, aparyp tastaýy tıis. Barlyǵy 150 oqýshy tasymaldanady.
— Mektepke 2023 jyly jumysqa keldim. Sońǵy úlgidegi avtobýs berildi. Bul menen de aqyldy kólik. Qandaı da bir aqaý bolsa sıgnal beredi. Avtobýspen saıjaı aýmaqtarynda turatyn balalardy tasymaldaımyn. Jol bul jerlerde joqtyń qasy. Sonda da amalyn taýyp, tasymaldaýymyz kerek. Jastar mundaı jerge kelmeıdi. Jalaqysy az. Ózim zeınetaqy alamyn, bul qosymsha tabys. Sonymen birge jastar avtobýs júrgizý sanatyn da ala almaıdy kóbine, — deıdi 72 jastaǵy júrgizýshi Serik Raıymbaev.
Jańa oqý jyly bastalar kezde mektep avtobýstary mindetti túrde tekseriledi. Olardyń tehnıkalyq jaraqtylyǵyn polıtsııa óz baqylaýyna alǵan.
Enbek.kz portalynda usynys ta, suranys ta kóp
Aqtóbe oblysy boıynsha 1600-den astam bos jumys orny usynylǵan. Kóbi bilim, medıtsına salasyna maman izdeıdi.
Olardyń arasynda bilikti dárigerler men muǵalimderge de suranys joǵary. Máselen pedagog-psıholog, ınformatıka, mýzyka páni muǵalimderine 85 000-100 000 teńge aralyǵynda jalaqy usynady. Al túrli saladaǵy dárigerlerge 250 myń teńgeden astam jalaqy belgilengen.
Sonymen birge memlekettik jáne bıýdjettik mekeme qyzmetkerleri de júrgizýshini jıi izdeıdi.
Sebebi mundaǵy jalaqy 85 myń teńgeden bastalady. Ári D sanaty bolýy tıis.
Tasymal qalaı júrgiziledi?
Elimizde «Shalǵaıdaǵy aýyldyq eldi mekenderde turatyn balalardy jalpy bilim berý uıymdaryna jáne keıin úılerine tegin tasymaldaýdy usyný» memlekettik qyzmetti kórsetý qaǵıdalary bar.
Bul — Memlekettik kórsetiletin qyzmetter týraly zań negizinde ázirlengen qaǵıda. Ereje boıynsha jeke tulǵa qalalyq, aýdandyq bilim bólimi nemese bilim berý mekemesine «Azamattarǵa arnalǵan úkimet» MK» KEAQ arqyly, ne bolmasa elektrondyq úkimettiń veb-portalyn paıdalanyp, ótinish beredi. Ótinish qabyldanǵany týraly hat jiberiledi.
Eske salsaq, 2023 jyly jeltoqsanda Aqtóbede olımpıadaǵa barar jolda birneshe oqýshy jol-kólik apatyna túsip, kóz jumdy. Sol kezde ata-analar tasymaldaý jumysynyń durys júrgizilmeıtinin aıtyp shaǵymdanǵan edi.