Aqtóbede medıtsınalyq mekemelerdiń barlyǵy ınternetpen qamtamasyz etiledi
Bıyl ınnovatsııalyq tehnologııalardy damytý aıasynda 25 mekeme 38 mıllıard teńge qarjy jumsap, óndiristi tsıfrlandyrady. Sonymen qatar, «EKSPO-2017» halyqaralyq kórmesiniń18 tehnologııasy óndiriske engizedi. Aqtóbe oblysy ákiminiń orynbasary Qaırat Bekenovtiń aıtýynsha, medıtsına men bilim berýdi tsıfrlandyrý da qolǵa alynǵan. Búginde oblystyq densaýlyq saqtaý basqarmasynyń mekemeleri 90% kompıýtermen, 84% ınternetpen qamtylǵan.
«Elbasy tapsyrmasyna sáıkes biz ekonomıkany barynsha tsıfrlandyrý úshin jan-jaqty sharalardy qabyldaýymyz qajet. Jalpy, tsıfrlandyrý elementteri áleýmettik bloktan bastap, ónerkásipke deıingi barlyq salaǵa engizilýi qajet»,- dedi óńir basshysy Berdibek Saparbaev.
Qazirgi kezde shalǵaı aýyldarǵa ınternet jelisin jetkizý jumysy júrip jatyr. Ázirge aýdan ortalyǵynan alysta ornalasqan dárigerlik, feldsherlik ambýlatorııalarda, medıtsınalyq pýnktterde ınternet joq. Osy olqylyqtyń ornyn toltyryp, jyl sońyna deıin oblystaǵy barlyq medıtsınalyq mekemelerdi kompıýtermen qamtamasyz etip, ınternetke qosý josparlanyp otyr.
Jıyn kezinde biryńǵaı oblystyq sıtýatsııalyq ortalyq qurý jaıy aıtyldy. Munda medıtsınalyq mekemelerge túsken naýqastar, sondaı-aq týý kórsetkishi boıynsha jan-jaqty aqparat kúndelikti tirkeledi. Bul qaǵazdan bas tartyp, elektrondy densaýlyq tólqujatyn qurýǵa múmkindik beredi.
Aıta keteıik, bıyl tsıfrlyq bilim berý sapasyn arttyrý maqsatynda «Baqytty bala» jobasynyń «Balalardyń ІT álemi» jáne «Tsıfrlyq saýattylyq - múmkindikter qalyptamasy» sekildi baǵyttary júzege asyrylady. Qazirgi kezde qala men aýdan ortalyǵyn ınternetpen qamtamasyz etý 100 paıyzdy quraıdy. Degenmen ǵalamdyq ınternet jelisi áli de 30 eldi mekenniń turǵyndaryna jetpeı otyr.