Aqtóbede qymbat qolóner buıymdaryna suranys joǵary - tiginshi
Aqtóbe oblysy Áıteke bı aýdanynda tigin tsehyn ashyp, bıznesin dóńgeletip otyrǵan kásipker isi kópke úlgi.
Ol aýyl áıelderi úshin memlekettik baǵdarlamanyń tıimdi ekenin tilge tıek etip, kópshilikke óz tájirıbesin aıtyp berdi.
«Kásipkerlerge ústemaqysy tómen nesıe beredi degen soń 2012 jyly tigin tsehyn ashtym. Sol kezde ,1,5 mln teńge nesıe aldym. Odan da kóp aqsha alýǵa bolady degen soń tez arada nesıemdi ótep, 7 mln teńgeni qaıta rásimdedim. Bes jylǵa rásimdegenimmen, 4 jylda óteýge múmkindik boldy. Keıin tsehtyń oqý bazasy sekildi jumys isteýine múmkindik berildi. Tiginshilikti osy jerden-aq úıretip, keıin adamdardyń jumysqa alýǵa bolady. Tártip boıynsha Jumyspen qamtý bólimi joldama beredi, biz qabyldap, úıretemiz», - dedi Bazargúl Nurjanova.
Kásipker 2020 jyly 4,5 mln teńge grant utyp, qural-jaqbyq satyp aldy. Memlekettik baǵdarlamanyń múmkindigin paıdalanyp, kir jýý mashınasy, jún tútetin stanok ákeldi. Qazir maqtany da, júndi de tútedi.
Eski kórpeni jańartýdy óz mindetine alǵan kásipker aýyl turǵyndarynyń tapsyrysyn áp sátte oryndap beredi. Sonymen birge oıý oıýǵa arnalǵan qural-jabdyq ta ákelindi.
Qazir 5 adam jumys isteıdi. Al 10 qyz-kelinshek oqyp, úırenip júr.
«Osy jerde oqytyp, jumysqa qabyldaý yńǵaıly. Biz pishý, tigý, quraýdy óz ádisimizben úıretemiz, keıin ony ujymǵa tez qabyldaıdy. Keıbiri oqyp, sertıfıkat alyp, kásip ashyp jatyr. Úıde otyrǵan analarǵa yńǵaıly. Jumys ornyn úıinen jasap alyp, bala-shaǵanyń jaǵdaıyn baqylap otyrady. Negizinen kórpe tigemiz. Besik quraly, qyrqynan shyǵarý rásimine arnalǵan zattar, qyz jasaýyn daıyndaımyz. Keıde kıim tigýge tapsyrys beredi. Ony da qabyldaımyz. Qazir jastyq 5-6 myń teńge bolsa, kórpe 7-8 myń teńgeden bastalyp, 15 myń teńgege deıin barady. Kórpege maqta, suranys bolsa jún salynady. Ózim júnnen jasalǵan kórpe jaqsy dep aıtar edim. Jeńil, tigýge de ońaı. Biraq keıbiri ıisin unatpaıdy», - dedi ismer aqtóbelik.
Arnaıy jarnama bólimi aýylda joq. Degenmen sheberdiń qolynan shyqqan buıymdy kórgen-bilgen jan izdep júrip, buıymtaıyn aıtady.
«Tapsyrysty aýyl adamdary beredi. Keıde qaladan suranys túsedi. Tipti elordadan tapsyrys boldy. Qyz jasaýy 160-170 myń teńgege shyǵady. Tapsyrysqa baılanys bul. 4 jamylǵy kórpe, 4 quraq kórpe, 4 jastyq, shaı kórpe jáne jas jubaılar kórpesi kiredi. Bólip tóleýge de beremiz. Erekshelikteri bar. Buryn quraqtyń jeńil túrin, arzan mata tańdalsa, qazir talǵam ózgerdi. Shıquraq qıyn. Biraq suranysy bar. Halyqtyń jaǵdaıy jaqsy. Elden ózgeshe bolǵanyn qalaıdy. Oıý-órgeni bar kórpege suranys joǵary dep aıtar edim. Sol úshin de lazerli apparat aldym. Oıý oıý óte yńǵaıly. Satyp alǵan bar tehnıkany ulym qarap, baqylap otyrady», - dedi ol.
Mundaǵy oqytý kýrsy 3 aıǵa josparlanǵan. Keıin tiginshilikti úırengen qyz-kelinshek óz betimen tapsyrys qabyldaı alady.
«Nólden bastaý qıyndaý bolady. Óıtkeni eń quryǵanda bir tigin mashınasy kerek. Jip pen matasy da qajet. Bıyl 20 adam úıretýdi maqsat etip otyrmyn. Úıde otyrǵan analar, joǵary bilimi bar, bala kútimimen aınalysatyn kelinshekter belsendi. Kóbisi kópbalaly ana. Olar tez úırenip kete alady. Shalǵaı aýyldan kelip oqyp, grant utyp alyp jatyr», - dedi Bazargúl Nurjanova.
