Aqtóbede kóshi-qon zańnamasyn buzǵan shetel azamattary ustaldy
Aqtóbede QR Kóshi-qon zańnamasyn buzǵan Bangladesh jáne Tájikstan azamattary ustalyp, keıbiri elden shyǵaryldy, dep habarlaıdy Kazinform.
Aqtóbe stantsııasyndaǵy jelilik polıtsııa bóliminiń jáne UQK Aqtóbe oblysy boıynsha shekara qyzmeti departamentiniń qyzmetkerleri temirjol vokzalyn tekserdi. QR Kóshi-qon zańnamasyn buzǵany úshin Bangladeshtiń 41, 31, 26 jastaǵy úsh azamatyn ustady.
Sheteldikterge QR ÁQBtK-niń 517-babynyń 4-bóligi, ıaǵnı, sheteldiktiń nemese azamattyǵy joq adamnyń Qazaqstan Respýblıkasynyń halyqtyń kóshi-qony salasyndaǵy zańnamasyn buzýy boıynsha ákimshilik hattama toltyryldy.
- Aqtóbe qalasynyń ákimshilik quqyqbuzýshylyq jónindegi mamandandyrylǵan aýdanaralyq sotynyń qaýlysymen sheteldik azamattar 5 jyl boıy QR aýmaǵyna kire almaıdy. Qazaqstan aýmaǵynan tys jerge shyǵaryp jiberý túrinde jaýapqa tartyldy.
Sonymen birge «Tosqaýyl» jedel aldyn-alý sharasy kezinde Qazaqstan Respýblıkasynyń kóshi-qon zańnamasyn buzǵany úshin Tájikstan Respýblıkasynyń eki azamaty ustaldy. Olar ákimshilik jaýapkershilikten qutylýǵa árekettengen.
Alaıda Aqtóbe stantsııasyndaǵy kóshi-qon qyzmet toby jáne UQK shekara qyzmetkerleri, Batys Qazaqstan oblysyndaǵy áriptesterine habarlasyp, tájikstandyqtardy Oral qalasynan ustady. Olar da ÁQBtK-niń 517-babynyń 4-bóligi boıynsha ákimshilik jaýapqa tartyldy.
Aqtóbe qalasynyń ákimshilik quqyqbuzýshylyqtar jónindegi mamandandyrylǵan aýdanaralyq sotyna sheshimimen eki sheteldiktiń bireýine 86 myń 250 teńge ákimshilik aıyppul salynyp, ekinshisi el aýmaǵynan shyǵaryldy, - dedi Aqtóbe stantsııasyndaǵy jelilik polıtsııa bóliminiń bastyǵy Aıbek Bekjanov.
