Aqtóbede qoqys polıgony órtenip, qalany taǵy tútin basty

AQTÓBE. QazAqparat - Aqtóbede qoqys polıgony túnde órtene bastady. Qazirgi kezde byqsyp, qalany tútin basty, dep habarlaıdy QazAqparat tilshisi.

Aqtóbe oblystyq TJD baspasóz qyzmetiniń habarlaýynsha, polıgondaǵy órt 25 tamyz kúni tirkelgen.

«Sóndirý jumystaryna órt sóndirý bólimderinen 40 órt sóndirýshi bardy. Sonymen birge «Batys Aqtóbe» JShS-nen jumysshylar boldy. 20 birlik tehnıka jumyldyryldy. Qazirgi tańda byqsyǵan qoqysty qummen jabý jumystary atqarylyp jatyr»,- dep habarlady Aqtóbe oblystyq TJD baspasóz qyzmeti.

Eske salsaq, bıyl maýsym aıynyń basynda qoqys polıgony órtenip, qalany kók tútin basqan bolatyn.

Sol kezde ekologtar tekserý júrgizdi.

«Zerthanalyq taldaý bóliminiń mamandary taldaý júrgizdi. Qoldaǵy aqparatqa súıensek, kómirtegi oksıdi 4,44 ese, azot dıoksıdi 16,3 ese, kúkirt dıoksıdi 13,9 ese asyp tur. Ekologııa departamenti qoqys polıgonyna jaýapty «Tabys Aqtóbe» JShS-ine jospardan tys tekserý taǵaıyndady», - degen edi Aqtóbe oblysy boıynsha Ekologııa departamenti memlekettik ekologııalyq baqylaý bóliminiń basshysy Turar Qojanov.

Ekologtar keıin aıyppul saldy.

Jospar boıynsha 2007 jyly ashylǵan qoqys polıgony bıyl jabylyp, túgel qummen jabylýy tıis. Ol úshin bıýdjetten shamamen 160 mln teńge qarjy bólindi. Jańasy bıyl qoldanysqa beriledi. Aýdany - 18 ga.