Aqtóbede kásipkerlerdi bopsalaǵan kúdikti ustaldy

AQTÓBE. KAZINFORM – Kúdikti ózin QR Sybaılas jemqorlyqqa qarsy kúres departamentiniń qyzmetkerimin dep tanystyrǵan. Ustalǵan kezde kóliginen 4 mln teńge aqsha tabyldy.

Aqtóbe oblystyq Polıtsııa departamenti Uıymdasqan qylmysqa qarsy kúres basqarmasynyń qyzmetkerleri QR Sybaılas jemqorlyqqa qarsy is-qımyl agenttigimen birge bopsalaýshy er adamdy ustady.

- Jedel-izdestirý is-sharalary barysynda Aqtóbe qalasynyń kásipkerlerinen aqsha bopsalap júrgen belgisiz tulǵa týraly aqparat alynǵan. Tekserý barysynda kúdiktiniń jeke kásipkerlerge qońyraý shalyp, ózin Sybaılas jemqorlyqqa qarsy qyzmettiń qyzmetkeri retinde tanystyrǵany anyqtaldy. Ol oıdan shyǵarylǵan aıyptaýlar arqyly qylmystyq is qozǵaıtynyn habarlap, qorqytqan. Jábirlenýshilerge qatysty qupııa aqparatty paıdalanyp, qysymdy kúsheıtken. Sóıtip qaladaǵy JShS biriniń kadr bóliminiń bastyǵynan 5 mıllıon teńge talap etken. Ustalǵan kezde onyń basqarýyndaǵy kólikten 4 mıllıon teńge tabylyp, tárkilendi, - dep habarlady oblystyq PD baspasóz qyzmeti.

Qazir Qylmystyq kodekstiń «Bopsalaý» baby boıynsha is qozǵalyp, sotqa deıingi tergeý bastaldy. Eger kúdiktiniń kinási dáleldense, ol 5 jyldan 10 jylǵa deıingi merzimge bas bostandyǵynan aıyrylýy múmkin.

Buǵan deıin aqpan aıynda Aqtóbe oblysy Alǵa aýdanynda kolledj stýdentteri óz qatarlastarynan aqsha bopsalaǵan. Ol kezde kúdiktiniń birinen pnevmatıkalyq tapansha tárkilendi.