Aqtóbede kásipkerdi bopsalaǵan kúdikti ustaldy

AQTÓBE. KAZINFORM – Kúdikti 7 mln teńge surap, 2 mln teńge alyp jatqan jerinen qolǵa tústi.

Aqtóbe oblystyq PD Uıymdasqan qylmysqa qarsy kúres basqarmasynyń qyzmetkerleri 34 jastaǵy kúdiktini aqsha alyp jatqan jerinen ustady. Ol buryn sottalǵan adam bolyp shyqty. 

- Ol iri kólemdegi qarajatty qorqytyp talap etti degen kúdikke ilikti. Kúdikti 2 mıllıon teńge alyp jatqan sátte qolǵa tústi. Tergeý barysynda ol kásipkerge uzaq ýaqyt boıy qysym kórsetip, jalpy 7 mıllıon teńge talap etkeni anyqtaldy.

Qazir kúdikti ýaqytsha ustaý ızolıatoryna qamaldy. Atalǵan derek boıynsha Qylmystyq kodekstiń «Bopsalaý» baby boıynsha sotqa deıingi tergep-tekserý júrgizilip jatyr,- dep habarlady oblystyq PD baspasóz qyzmeti. 

Eske salsaq, Alǵa aýdanynda kolledj stýdentteri óz qatarlastarynan aqsha bopsalaǵan. Kúdiktiniń birinen pnevmatıkalyq tapansha tárkilendi.