Aqtóbede karantın shekteýin jeńildetý máselesi qaraldy

AQTÓBE. QazAqparat – Aqtóbede kásipkerler oblystyń bas sanıtar dárigerinen karantın shekteýin jeńildetýdi surady. Suranysqa saı senbi, jeksenbi kúnderi bazarlar men qoǵamdyq tamaqtaný oryndary qaıta jumys isteýi múmkin, dep habarlaıdy QazAqparat tilshisi.

Aqtóbe oblysy boıynsha 3600-den astam kásipkerlik nysan men mekemede «Ashyq» jobasy bar. Olardyń 70-ke jýyǵy «kóshbasshy» mártebesin alǵan. Búgin óńirlik kásipkerlik palatasyna jınalǵan bıznes ıeleri elimizdegi karantın shekteýine baılanysty oblys aýmaǵynda da jańa qaýly qabyldaýǵa shaqyrdy. Kezdesýge oblystyq sanıtarııalyq-epıdemıologııalyq baqylaý departamentiniń basshysy Nursulý Berkimbaeva qatysyp, mán-jaıdy túsindirdi.

«Osy aptada kún saıyn 400-500 adamnan koronavırýs ınfektsııasy tabylýy múmkin dep aıtqanmyn. Bul kelesi aptanyń alǵashqy jartysynda da jalǵasýy múmkin. Demek áli de epıdemıologııalyq ahýal kóńil kónshitpeıdi. Biz vedomstvoaralyq komıssııanyń sheshiminen soń jańa qaýlyny daıyndaýǵa kiristik. Endi senbi, jeksenbi kúnderi qoǵamdyq tamaqtaný oryndary, saýda oryndary, saýda úıleri men ashyq, jabyq bazarlardyń jumys isteýine ruqsat berilýi múmkin. Bir talapty esken shyǵarmaımyz. Onda «jasyl» mártebesi bar adamdar ǵana kire alady. Sonymen birge bizdegi bazarlardyń birneshe kirý-shyǵý esigi bar. Árqaısysynyń aldynda jaýapty qyzmetker turyp, bárin QR kod arqyly kirgizýi shart. Eger medıtsınalyq kórsetkishine baılanysty vaktsına saldyrmasa, anyqtama suralady. Sonymen birge vırýs juqtyryp, ýaqytsha ekpe almaı júrgender de rastaý qujatyn kórsetýi tıis», - dedi oblystyq sanıtarııalyq-epıdemıologııalyq baqylaý departamentiniń basshysy Nursulý Berkimbaeva.

Aıta keteıik, jeksenbi kúnderi qalada qoǵamdyq kólik júrmeıdi. Bul shekteý sol kúıi ózgerissiz qalmaq