Aqtóbede qala jáne aýyl ákimderi saılandy

AQTÓBE. KAZINFORM — Alǵa qalasynyń ákimi Jandarbek Baqynjanuly boldy. Sonymen birge óńirde úsh aýyldyń ákimi aýysty. 

Aqtóbeniń Alǵa jáne Áıteke bı aýdandarynda qala jáne aýyldyq okrýg ákimderi saılandy. Buǵan deıin ákim bolǵandardyń bári ókilettiligin merziminen buryn bosatty. Tórt ákimdi saılaýǵa 2 aýmaqtyq jáne 20 ýchaskelik saılaý komıssııasy qurylyp, jumys istedi.

— Barlyǵy 4 saılaý okrýgi boıynsha 14 kandıdat usynyldy. Onyń bireýi — «AMANAT», endibireýi — «Aýyl», taǵy bireýi — «Respublica» partııasynan. Ózgesi ózin-ózi usyndy. Kandıdattardyń basym bóligi, ıaǵnı, 71%-dan astamy — memlekettik qyzmetshi. Sonymen birge ekeýi — bıýdjettik sala, bireýi — kommertsııalyq qurylym qyzmetkeri, bireýi — ýaqytsha jumyssyz. Tirkeýge deıin 2 kandıdat memlekettik qyzmet zańnamasynyń talaptaryna sáıkes kelmeı, tizimnen alyndy. Saılaýǵa 12 kandıdat qatysty. Saılanǵan ákimderdiń ekeýi — memlekettik, ekeýi — bıýdjettik sala qyzmetkeri, — dep habarlady Aqtóbe oblystyq aýmaqtyń saılaý komıssııasy.

Alǵa qalasyna Jandarbek Baqytjanuly ákim bolyp saılandy. Ol buǵan deıin aýdan ákiminiń orynbasary qyzmetin atqardy. Tamdy aýyldyq okrýginiń ákimi bolǵan Marat Nurtazın buǵan deıin «Jeruıyq» negizgi mektebiniń dırektory boldy. 

Al Áıteke bı aýdany T.Júrgenov aýyldyq okrýgine Salamat Erimbetov ákim boldy. Ol buǵan deıin aýdan ákimi apparatynyń bólimshesin basqardy. Qarabutaq aýylynyń ákimi qyzmetine Erbaqyt Qarjaýbaev saılandy. Mektepte, aýyldyq, aýdandyq ákimdikte, keıin mádenıet úıinde dırektor qyzmetin atqarǵan. Erbaqyt Qarjaýbaev byltyr naýryz aıynda mas kúıinde kýálandyrýdan bas tartyp, sot sheshimimen 15 táýlikke qamaldy. Ol Ákimshilik quqyqbuzýshylyq týraly kodekstiń 613-baby 4-bóligi boıynsha jaýapqa tartyldy.

Eske salsaq, Aqtóbede isti bolǵan eki ákimniń ornyna jańasy saılanady. Qazirgi kezde Hromtaý jáne Qandyaǵash qalasy ákimine úmitkerlerdiń tizimi anyqtaldy. Eki qalada da úsh úmitkerden bar.