Aqtóbede et qanshadan satylyp jatyr
AQTÓBE. KAZINFORM — Aqtóbede sıyr etiniń kelisi 3300-4000 teńge bolyp tur. Al eger bazarǵa baryp tańdap, sıyr soıyp alsańyz kelisin 2700-2800 teńgege eseptep beredi. Kazinform tilshisi mal baǵyp satýshylarmen, tasymaldaýshylarmen sóılesti.
Qaı zattyń da baǵasy tapshylyq bolǵanda kóteriledi — sharýa
Aqtóbe oblysy aýdandaryndaǵy sharýalar baqqan maldy qalaǵa tasymaldap, mal bazarǵa shyǵarady. Al keıde deldaldar sol aýyldaǵy sharýashylyq basynan alyp, qalaǵa ákelip satady. Baǵa da soǵan saı ózgerip otyrady.
— Bálkim iri qara basy azaıǵan shyǵar. Qaı zattyń da baǵasy azaıǵanda kóteriledi. Qazir gaz, benzın baǵasy, azyq-túlik quny kóterildi. Et baǵasy nege sol kúıi qalýy kerek? Byltyr sıyr etiniń kelisi 2200-2300 teńge boldy. Qazir kelisi 2700-2800 teńge. Bul kóterme baǵa. ıAǵnı, sıyrdy tańdaıdy, soıyp, sol kúıi satyp alady. Aýylda elimizdiń ońtústiginen kelip mal jınap, alyp ketetinder bar. Olar da kúnkóristiń qamymen júrgen adamdar, — dedi mal sharýashylyǵynyń ıesi Qaırat Dáýletov.
Onyń aıtýynsha, baspaqty salmaǵy 100 keliden asqanda, sıyrdy salmaǵy 150-200 keli tartqanda satady. Baǵany eseptegen kezde salmaǵyn 2700-2800 teńgege kóbeıtedi.
— Іri qara men qoıdy baǵý qıyn. Sońynda adam júrý kerek. Beıneti kóp sharýa. Al jylqy maly dalalyqta júredi. Anda-sanda qarap, túgendep qoıamyz. Qazir aýylda múıizdi iri qaradan góri jylqy sany artyp keledi. Meniń oıymsha sıyr men qoı etiniń baǵasy qymbattasa, mal basy kóbeıetin shyǵar, — dedi Qaırat Dáýletov.
Baǵa jyl saıyn ózgeredi — satýshy
Aqtóbe qalasyndaǵy mal bazarynan qoı-eshki, múıizdi iri qara men jylqyny tirileı satyp alýǵa bolady. Mundaǵy adamdardyń kóbi deldal qyzmetin atqarady. Satýshylar baǵanyń bıyl kóktemnen bastap kóterilgenin aıtyp berdi.
— Byltyr kóterme baǵa kelisine 2200 teńge bolsa, qazir onyń quny 2800 teńgege jetti. Aýyldan kóterme baǵada satyp alyp, mal bazarǵa ákelemiz. Men iri qarany qarap, salmaǵy qansha tartatynyn shamamen bilemin. Jobalap baǵa qoıylady. Eger et kombınatyna ótkizsek tirileı ólshep, kelisin 1500 teńgege beremiz. Al soıyp satsa, kelisi 2800 teńge bolyp shyǵady. Baǵa qalaı ózgerdi? Biz aýylǵa baryp, iri qarany alamyz. Bizben qatar Ózbekstannan kelgen deldaldar da júredi. Sıyrdy 200 myń teńgege satyp almaq bolsam, Ózbekstannan kelgender 300 myń teńge usynady. Sóıtip olar qymbatyna ótkizedi. Qazir bizge qaraǵanda sol jaqta et baǵasy joǵary, — dedi mal bazardaǵy satýshy Myrzabek.
Sondaı-aq Aqtóbege kórshiles Reseıden de sıyr eti tasymaldanǵan. Tek rýbl baǵasy óskende bul baǵyttaǵy saýda-sattyq ózgerdi.
— Qazir Reseıden et tasý tıimsiz. Qazaqstanǵa ákelip satsa baǵasy qymbatqa shyǵyp, ótpeıdi. Al Ózbekstanǵa tasymaldaıtyndar aýdan, aýylǵa ǵana emes, qaladaǵy mal bazaryna da kelip alyp ketedi. Úlken júk kóligimen baryp, qujattary rettelgen iri qarany tıep alady. Bári zańdy. Shamamen bir barǵanda 40-50 bas satyp alady. Buryn da satyp alatyn. Biraq ol kezde baǵaǵa qatty áser etpedi. Olardyń aıtýynsha, Ózbekstannan ári qaraı ózge elge tasymaldanatyn sekildi, — dedi Myrzabek.
Onyń aıtýynsha, qysta baǵa taǵy ózgerýi múmkin. Sebebi bordaqylaý oryndary eki aı buryn baspaqty 250 myń teńgeden qabyldasa, qazir 300 myń teńgege jetti.
Іri bordaqylaý oryndary men usaq sharýashylyqtar satyp alyp, semirtip, birer aıda qaıta satady. Búginde bazarda baspaq 300-350 myń, qashar 350-400 myń, sıyr 550-600 myń teńge bolyp tur.
— Qoı baǵasynda da ózgeris bar. Ony da júk kóligimen tıep ketip jatyr. Tipti muzdatqan qalpynda da alady. Qoı etiniń kóterme baǵasy kelisine 2700-2800 teńge, — dedi ol.
Et baǵasynda ósim bar — statıstıka
Aqtóbe oblysynda et baǵasy ósken. Oblystyq statıstıka departamenti 8 aıda da, tipti sońǵy bir aıda da baǵanyń udaıy joǵarylap turǵanyn aıtty.
— Bıyl 8 aıda et baǵasy 10,7 paıyzǵa ósti. Onyń ishinde sıyr eti 15,7%, jylqy eti 6,9%, qoı eti 10,3%, qus eti 11,6% artty. Tamyz aıynda da et baǵasy ósti. Onyń ishinde sıyr etiniń baǵasy 2,9%, jylqy eti 6,9%, qoı eti 4,8%, qus eti 5,1% artty, — dedi Aqtóbe oblystyq statıstıka departamenti baǵa basqarmasynyń basshysy Shara Nurpeıisova.
Al Aqtóbe oblystyq aýyl sharýashylyǵy basqarmasy et baǵasyn turaqtandyrý úshin mal bordaqylaý alańdaryna 100 mln teńge aınalym qarjysyn bóldi.
— Aqtóbe oblys boıynsha iri qara mal basynyń sany — 615 045. 2025- 2026 jylǵy mal qystataý naýqanyna 492 036 shartty mal basy túsedi dep josparlanǵan. Oblysta et baǵasyn turaqtandyrý maqsatynda mal bordaqylaý alańdaryna Agrarlyq nesıe korporatsııasy arqyly 100 mln teńge nesıe berý kózdeldi. Qazirgi kezde biraz ótinim tústi. Nesıe ústemeaqysy — 5%. Talap boıynsha bordaqylaý oryndary qarjynyń 70 paıyzyna mal satyp alýy tıis. Sonymen birge buqashyqtardyń keminde teń jartysyn otandyq et óńdeý kásiporyndaryna ótkizýi kerek, — dep habarlady Aqtóbe oblystyq aýyl sharýashylyǵy basqarmasy.
Aıta keteıik, Aýyl sharýashylyǵy vıtse-mınıstri Azat Sultanov óńirlerde shamamen 50 myń tonna et qory bar ekenin aıtqan. Bul qor birneshe aıǵa jetedi.
Onyń aıtýynsha, baǵa retteý mehanızmi jergilikti ákimdikterge tıesili.