Aqtóbede er adam 19-qabattan sekirip ketti

AQTÓBE. KAZINFORM — Aqtóbedegi 25 qabatty úıdiń 19-shy qabatynan er adam sekirip ketti. Qazir qylmystyq is qozǵalyp, tergeý júrip jatyr.

Oqıǵa búgin túngi saǵat 02:00 shamasynda boldy. Aqtóbe qalasyndaǵy 11 shaǵyn aýdanda ornalasqan 25 qabatty úıden er adam sekirip ketti. 

— № 112 «V» úıiniń 19 qabatynan 1995 jyly týǵan er adam sekirip ketken. Sebepteri anyqtalýda. Óz-ózine qol jumsaý faktisi boıynsha sotqa deıingi tergeý bastaldy, — dep habarlady Aqtóbe oblystyq PD baspasóz qyzmetiniń jetekshisi Erbolat Sarqulov.

Aıta keteıik, Aqtóbedegi dál osy 25 qabatty úıden sekirip, óz-ózine qol jumsaıtyndar kóp. 2020 jyly munda qyz ben jigit sekirip ketip, kóz jumdy. 

Byltyr 5 aıda Aqtóbe oblysynda 168 adam óz-ózine qol jumsaǵan. Onyń 47-i kóz jumdy.

Aqtóbe oblystyq prokýratýra basqarmasynyń prokýrory Ashat Makaev sol kezde sýıtsıd jıi jasalatyn oryndarǵa monıtorıng júrgizip, olardy boldyrmaý úshin sharalar qabyldaýdy usyndy.

Ásirese 25 qabatty turǵyn úı keshenindegi balkonnyń ashyq ýchaskelerine qorshaýlar ornatý mindetteldi. 

«Shatyrǵa shyǵatyn esikterdi qulyptaý mindeti kondomınıým tóraǵalary jáne múlik ıeleriniń birlistigi basqarýshylaryna júktelýi tıis. Sonymen birge sýıtsıdtiń aldyn alý jónindegi vedomstvoaralyq top quryp, árbir faktini zerttegen durys. Qaıǵyly oqıǵany boldyrmaý úshin arnaıy tetikterdi ázirleı otyryp, sebepterdi aıqyndaý, onyń ishinde halyqaralyq tájirıbeni zerdeleý jáne ony engizý týraly hat joldandy. Bul másele oblys prokýratýrasynyń erekshe nazarynda», — dedi prokýror Ashat Makaev.