Aqtóbede eki kúnde 1300-den astam jol erejesin buzǵandar anyqtaldy — ІІM
ASTANA. KAZINFORM — Іshki ister mınıstrligi el joldaryndaǵy apattylyqty azaıtý, sondaı-aq jol jáne qoǵamdyq qaýipsizdikti qamtamasyz etý baǵytyndaǵy aýqymdy jumystardy jalǵastyryp otyr. Qazirgi ýaqytta vedomstvo jekelegen óńirdi tekserý formatyna kóshti. Dál qazir mundaı is-sharalar Aqtóbe oblysynda belsendi túrde ótip jatyr.Bul týraly Polisia.kz jazdy.
— Tıimdilikti barynsha arttyrý úshin Astana qalasy, Qaraǵandy jáne Qostanaı oblystary patrýldik polıtsııa bólinisteriniń qosymsha kúshteri men quraldary tartyldy. Buǵan deıin mundaı maqsatty tekserýler Almaty men Shymkent qalalarynda, sondaı-aq Almaty, Qaraǵandy jáne Túrkistan oblystarynda óz tıimdiligin dáleldegen bolatyn. Tájirıbe kórsetkendeı, kúshterdi jumyldyrý eń qaýipti quqyq buzýshylardy jedel anyqtaýǵa múmkindik beredi, — dedi ІІM ákimshilik polıtsııa komıtetiniń erekshe tapsyrmalar jónindegi aǵa ınspektory Gúlnur Qudaıbergenova.
Aqtóbede is-sharanyń eki kúninde jol júrisi qaǵıdasyn buzýdyń 1351 deregine tosqaýyl qoıyldy. Apattylyqqa tikeleı áser etetin jáne azamattardyń ómirine qaýip tóndiretin óreskel buzýshylyqtarǵa erekshe nazar aýdaryldy.
Atap aıtqanda eki kún ishinde:
- kólikti mas kúıde basqarýdyń 11 deregi;
- esirtki jáne psıhotroptyq zattardy medıtsınalyq emes maqsatta tutynýdyń 1 deregi; qarsy qozǵalys jolaǵyna shyǵýdyń 5 deregi;
- baǵdarshamnyń tyıym salý sıgnalyna ótýdiń 20 deregi anyqtaldy. 47 adam júrgizýshi kýáliginsiz kólik basqarǵan.
Sonymen qatar joldarda apatty jaǵdaılar týdyratyn júıeli zań buzýshylyqtardyń joly kesildi:
- 56 avtokólik memlekettik tirkeý nómirinsiz júrgen;
- 1 júrgizýshi jalǵan nómir paıdalanǵan;
- 208 kólik quraly tehnıkalyq reglament talaptaryna saı kelmegen;
- 180 kólik mindetti tehnıkalyq baıqaýdan ótpegen;
- 150 júrgizýshi qaýipsizdik beldigin taqpaǵan;
- 65 júrgizýshi kólik júrgizý kezinde uıaly telefonǵa alańdaǵan.
Jaıaý júrginshiler de jaýapkershilikke tartyldy. Olardyń tarapynan jol qozǵalysy erejelerin buzýdyń 66 deregi tirkeldi. Eki kúnde arnaıy aıyppul turaqtaryna 110 kólik qoıyldy.
Onyń ishinde 11 avtokólik sheteldik esepte turǵan, sondaı-aq túrli buzýshylyqtary úshin memlekettik tirkeý nómirleri alynǵan 41 kólik quraly bar. Mundaı tekserýler eldiń basqa óńirlerinde de jalǵasatyn bolady. ІІM jol qozǵalysynyń barlyq qatysýshylaryna jol júrisi qaǵıdalaryn saqtaýdy eskertedi.
Aıta keteıik, buǵan deıin Aqtóbedegi óńiraralyq patrýldeý kezinde 500-den astam zańbuzýshylyq anyqtalǵan bolatyn.
