Aqtóbede eki qabatty úıdiń turǵyny opyrylyp túsken baspaldaqpen birge qulady
Aqtóbe qalasynda salynǵanyna 60 jyldan astam ýaqyt bolǵan eki qabatty úıde baspaldaq opyrylyp tústi. Dál sol ýaqytta baspaldaq ústinde turǵan 40 jasqa taqaǵan áıel de ekinshi qabattan birinshi qabatqa qulap ketti, dep habarlaıdy Kazinform.
Oqıǵa keshe tús mezgilinde boldy. Aqtóbe qalasy Gagarın kóshesindegi 7-shi úıdiń turǵyny túski astan soń jumystarymen dalaǵa shyqqanda baspaldaqpen birge opyrylyp tústi.
- Gagarın kóshesi 7 úıdegi eki qabatty úıdiń ekinshi qabatynda 4 páter bar. Onda 10-nan astam jan turady. Oqıǵa keshe túste boldy. Kórshim tómen túsip bara jatqanda baspaldaqpen birge qulady. Sodan biz úıden shyǵa almaı, ekinshi qabatta qaldyq. Bul úı 1958 jyly salynǵan. Biraq 1961 qoldanysqa berilgen. Qujatta solaı jazýly tur. Úıimizdiń tóbesinen sý aǵady. Bıyl jylý qubyry jarylyp ketip, podezd bý bolyp ketti. Sodan elektr symdary da shytynaı bastady. Qazir jeke bir kompanııa ókilderi keldi. Baspaldaqty temirden jasamaq. Al biz júrip-turý úshin aǵash tósep qoıdyq. Keıbiri jumys dep bir tún úıine qonbady. Biz tegin nárse suramaımyz. Termojańǵyrtýǵa ruqsat bergenin qalaımyz. Al apatty dep jańasyn satyp alýǵa mıllıondarymyz joq,- dedi turǵyn Elena Chılochı.
Qazirgi kezde zardap shekken turǵyn dárigerlerge qaralyp júr. Aqtóbe oblystyq densaýlyq saqtaý basqarmasynyń habarlaýynsha, ony neırohırýrgter men travmatologtar qarap shyqty.
- Baspaldaqtan opyrylyp túsken meniń kelinim. Ol nemeremdi úıge ákelip, túski astan soń syrtqa shyqqan. Sol kezde gúrs etken dybys estildi. Shyqsam kelinim tómende otyr. Jedel járdem bir saǵatqa jýyq ýaqytta áreń keldi. Sodan keshke deıin medıtsınalyq tekserýden ótti. Búgin dári-dármek alý, tekserilý úshin taǵy ketti. Denesinde kógergen jeri kóp. Ózim bıikten qorqamyn. Kesheden beri dalaǵa shyqqanym joq,- dedi Marına Davdrıh.
Aqtóbe qalasy ákiminiń baspasóz qyzmetiniń habarlaýynsha, 2020 jyly Gagarın kóshesi úıdiń turǵyndaryna qalanyń turǵyn úı ınspektsııasy bólimi úıdiń tehnıkalyq saraptamasynan ótýge kómektesti.
- Lıtsenzııalyq kompanııa úıdi tolyǵymen apatty dep tanyǵan joq. Úı kúrdeli jóndeýden ótýge jaramdy degen qorytyndy jasap berdi. Sodan keıin úı turǵyndaryna termodernızatsııa baǵdarlamasy usynyldy, biraq olar kelispedi. Olar qazir de qaıtadan tehnıkalyq tekserýge óz betinshe júgine alady. Tek lıtsenzııasy bar mekemege jasatýlary kerek. Ol týraly turǵyndarǵa túsindirildi. Úı apatty dep tehnıkalyq anyqtama bergennen keıin apatty úı retinde esepke qoıylady. Sol jerge turǵyn úı ınspektsııasynyń basshysy, mamandar bardy. Turǵyndarmen "Astana" aýdanynyń ákimi Almas Jaqsylyqov kezdesti. Synǵan baspaldaqtyń máselesi sheshildi. Jóndeý úshin mamandardy shaqyrttyq. Eki kún ishinde olar jańa baspaldaq jasap beremiz dep ýáde etti. Burynǵy baspaldaqtyń negizi aǵashtan jasalǵan bolatyn, endi negizin temirden jasap, qondyryp beredi,- dedi Aqtóbe qalasy ákiminiń baspasóz qyzmeti.
Aqtóbe qalasynda qazir 34 apatty turǵyn úı bar. Jergilikti ákimdik tek 8 úıdegi adamdardy kóshirýdiń josparyn jasap qoıǵan.
