Aqtóbede Dosjan ıshan kesheninde qazba jáne qalpyna keltirý jumystary júrgiziledi
AQTÓBE. KAZINFORM – Temir aýdanyndaǵy Dosjan ıshan meshitinde bıyl qazba jáne qalpyna keltirý jumystary jalǵasady.
Dosjan ıshan keshenindegi zertteý jumystarynyń bastalǵanyna 5 jyldan asty. Sodan beri mundaǵy medrese men meshitte restavratsııa bastaldy. Bıyl Dosjan ıshannyń úıi men munara ornynda qazba jumystary júrgiziledi. Jobalyq-smetalyq qujat daıyndalǵan soń eki nysan da qalpyna keltireledi.
- Bıyl meshittiń soltústik bóligi qalpyna keltiriledi. Sol qabyrǵasy jaqsy saqtalǵan. Byltyr oıý-órnekke konservatsııa jasalǵan edi. Barlyǵy 15 sharshy metr jerde ornalasqan oıý-órnekti qyryp alyp, mýzeıge saqtaıdy. Al 1 sharshy metrdi Almatyǵa alyp ketedi. Sol jaqta zertteý júrgizip, quramyn anyqtaıdy. Keıin sol negizde meshittiń soltústik qabyrǵasy kóteriledi,- dedi Tarıhı-mádenı murany zertteý, qalpyna keltirý jáne qorǵaý ortalyǵynyń dırektory Farhad Dosmuratov.
Jospar boıynsha Dosjan ıshan keshenin tolyq qalpyna keltirý jumystary 2026 jyly aıaqtalýy tıis.
Buǵan deıin habarlaǵanymyzdaı, Qunanbaımen birge Mekkede qonaqúı saldyrǵan Dosjan ıshan meshitindegi dekor elementteri byltyr anyqtalyp, kópshilik qyzyǵýshylyǵyn týǵyzdy.
Bógde adamnyń qolynda bolǵan Dosjan ıshannyń móri 2019 jyly mýzeıge tapsyrylady.
Sonymen birge bıyl Aqtóbede ǵun-sarmat kezeńiniń eskertkishterine zertteý jalǵasady. Á.Marǵulan atyndaǵy arheologııa ınstıtýtynyń Batys Qazaqstan boıynsha fılıalynyń dırektory Aslan Mamedovtiń aıtýynsha, bul kezeńdi zertteý jumysy tek keıingi jyldary ǵana qolǵa alynǵan.
- Ǵun-sarmat kezeńiniń eskertkishi ár aýdanda bar. Qazir biz taýyp, zerttep, kartaǵa túsirip jatyrmyz. Keıbirinde tym az bolsa, keıbir aýdanda jumystyń uzaqqa sozylatyn túri bar. Kóbi Temir, Oıyl, Qobda jáne Muǵaljar men Áıteke bı aýdandarynda. Eń qyzyǵy – jerleý rásimi ózge. Bul kezeńde úlken qorym paıda bolǵan. Temir dáýirinde qyrdyń basynda bolsa, munda oıda, ózen jaǵasynda da kezdesedi. Qorǵan da, ǵıbadathana da bar bul dáýirde. Ásirese Batys Qazaqstanda kóp. Tipti 5-6 shaqyrymǵa sozylyp jatyr,- dedi Aslan Mamedov.