Aqtóbede bógetti nyǵaıtý kezinde taý-ken massasy qoldanyldy
AQTÓBE. KAZINFORM – Aqtóbelik ardager Dáýletjan Kúzembaev sý tasqyny kezinde bógetti nyǵaıtý jumystaryna taý-ken massasyn qoldanýǵa keńes berdi. Nátıjesinde Muǵaljar aýdany Muǵaljar aýyly aman qalyp, sýdy saqtap qalýǵa múmkindik boldy.
Muǵaljar aýyly aýdan ortalyǵynan 135 shaqyrym qashyqtyqta ornalasqan. Munda 1500-den astam adam turady. Kóbi qıyrshyq tas zaýytynda eńbek etedi ári mal sharýashylyǵymen aınalysady. Muǵaljar aýylynan 6-7 shaqyrym qashyqtyqta sý arnasy ornalasqan ári Jem ózenine quıatyn arnanyń bári osy aýyl mańyndaǵy Muǵaljar taýynan bastaý alady.
- Sý tasqyny kezinde aýyl ústimen úsh sý aǵyny ótti. Der kezinde úlken zaýyttar kómektesip, úıler aman qaldy. Altaly bógeti men Aıryq bógetin 1982 jyldary kásipker saldyrǵan. Altaly bógetin salyp, baý-baqsha ónimderin ekken. Al Aıryq bógeti zaýyt úshin salynǵan. Qıyrshyq tas óndiretin zaýyt ony jýý jumystaryna qoldanǵan. Eki bóget te qazir qoldanysta,- dedi Muǵaljar aýylynyń ákimi Álimjan Qorǵanbaı.
Sý tasqyny kezinde Altaly bógetiniń bir buryshy buzylǵan. Biraq bul aýylǵa esh qaýip tóndirmegen.
- 1980-1982 jyldary Altaly bógeti salyndy. Sol kezde qurylys jumystaryna ózim de qatystym. Halyqty kókónispen qamtý, qaýipsizdik úshin dep salyndy. Ári bul aımaq demalys orny da boldy. Altalynyń negizgi bóligi sol kúıi saqtalǵan. Al sý ótken jeri qulaq dep atalady. Bul ádeıi artyq sý tómen aǵyp ketsin dep jasalǵan eńis. Bıyl toń qalyń bolyp, qar tez erigende de bógettiń negizi sol kúıi qalyp, tómen jaqtan sý aqty. Biz taý-ken massasyn aldyn ala daıyndap qoıdyq. Ony paıdalanýǵa qajeti bolmady. Al bógettegi qulaqty sý deńgeıi tómendegende taý-ken massasymen jabamyz. Sol kezde sýdy tolyq saqtap qalamyz,- dedi eńbek ardageri Dáýletjan Kúzembaev.
Onyń aıtýynsha, zaýyttar júk kólikterin bólip, kóktemde járdem berdi. Al aýyldyń baıyrǵy turǵyndary óz tájirıbesimen bólisip, sý saqtaıtyn aýmaqty keńeıtti.
