Aqtóbede bıyl úsh dáýirdiń eskertkishi zertteledi

AQTÓBE. KAZINFORM – Aqtóbe oblysynda bıyl erte temir, qola jáne tas dáýiri jáne ǵun dáýiriniń eskertkishteri zertteledi.

Aqtóbe oblystyq tarıhı-ólketaný mýzeıi bıyl úsh iri jobany iske asyrýdy josparlap otyr. Olar: erte temir dáýiri, qola jáne tas dáýiri jáne ǵun dáýiri. 

— Erte temir dáýiri Muǵaljar aýdany aýmaǵyndaǵy Orqash qorymynda zertteledi. Qola dáýiri Qarǵaly aýdanynyń Taranǵul qonysy men qorymynda zerttelse, ǵun dáýirine tán eskertkishter Qobda jáne Áıteke bı aýdany aýmaǵynda ornalasqan, — dedi Aqtóbe oblystyq tarıhı-ólketaný mýzeıiniń dırektory Meıram Dúısenǵalı.

Onyń aıtýynsha, sý tasqynyna baılanysty qarjy únemdelip, kóp joba qysqartylǵan. Degenmen kóktemgi sý tarıhı qorymdarǵa zaqym keltirmegen. 

— Kóktemgi sý tasqyny kezinde qandaı da bir tarıhı orynnyń búlingeni týraly aqparat túspedi. Kóshpendilerdiń bir ereksheligi, qorymdy bıik jerge qoıǵan. Qazir bizdiń zertteıtinimiz de osy qorymdar. Qonystar men eldimeken bizdiń aımaqta az. Olar ózen jaǵasynda ornalasady negizi. Kóne qonys bolsa, qola dáýirine jatatyny jerastynda bolady. Qatty tolqyn bolmasa ashylmaıdy kóbine. Ázirge ondaı aqparat joq, — dedi Meıram Dúısenǵalı.