Aqtóbede «Baqytty otbasy» ortalyǵy ashyldy
«Baqytty otbasy» ortalyǵy ata-ana men balalar arasyndaǵy qarym-qatynasty nyǵaıtyp, otbasylyq máselelerdi sheshýge negiz bolmaq. Bul jerde ult qundylyqtary da nasıhattalady.
«Sońǵy jyldary elimizde bala tárbıesi men otbasy qundylyqtaryna kóp kóńil bólinýde. Balalardy qorǵaý, otbasyn qoldaý máseleleri qashanda Nur Otan partııasynyń nazarynda. Osy oraıda 7 jyl buryn partııa bastamasymen memlekettik organdar men azamattyq qoǵamdy jumyldyryp, otbasylarǵa naqty is júzinde kómek kórsetý, ózekti máselelerin sheshý jumysy atqarylyp keledi. Qazirgi ýaqytta óńirimizde otbasy úlgisindegi 4 balalar úıi (Hromtaý, Mártók, Qobda, Temir) jumys isteıdi. «Meıirim« jastardy áleýmettik beıimdeý ortalyǵyn «Sábı« jeke qaıyrymdylyq qory syıǵa tartty. Ortalyq 80 páter men ákimshilik ǵımarattan turady. Ortalyqtyń negizgi qyzmeti - balalar úıleriniń túlekterin áleýmettik beıimdeý», - dedi Nur Otan partııasynyń oblystyq fılıal tóraǵasynyń birinshi orynbasary Erbol Danaǵulov.
Muqtaj jandarǵa kómek kórsetý, olardy qoldaý – «Baqytty otbasy» jobasynyń basty maqsatynyń biri. Ótken jyly kámeletke tolmaǵandardy beıimdeý ortalyǵy men Alǵa balalar úıin biriktirý nátıjesinde «Aıala» qıyn ómirlik jaǵdaıda júrgen balalardy qoldaý ortalyǵy ashyldy. Sondaı-aq Aqtóbe qalasynda «Málıke» arnaıy qoldaý ortalyǵy jumys istep tur. Bul jerde ómirdiń qıyn jaǵdaıyna tap bolǵan áıelder men balalarǵa psıhologııalyq, zańgerlik jáne áleýmettik qyzmet kórsetilip keledi. Al oblysymyzdaǵy «Kúnshýaq» ınklıýzıvti balalar lagerinde ótken jyly 600-den astam erekshe bilim berý qajettiligi bar balalar qurdastarymen birge demaldy.
Aıta keteıik, «Baqytty otbasy» ortalyǵy otbasylyq kómekke muqtaj jandarǵa arnaıy qyzmet kórsetedi. Ortalyqtaǵy psıholog, medıator, zańger, áleýmettik pedagog, memlekettik mememe qyzmetkerleri, depýtattar, qoǵamdyq uıym belsendileri qabyldaý ótkizetin bolady. Quqyq qorǵaý máseleleri, jumyspen qamtý jáne áleýmettik kómek kórsetý, zeınetaqyna taǵaıyndaý, bilim berý men tárbıe, balalardy mektepke deıingi uıymdarmen qamtamasyz etý, turǵyn úı, jer berý máseleleri de osy ortalyqta qaralady.
