Aqtóbede «Aıbyn» áskerı-patrıottyq spartakıadasy bastaldy

Aqtóbede áskerge deıingi jasóspirimder arasyndaǵy «Aıbyn» áskerı-patrıottyq spartakıadasynyń saltanatty ashylýy ótti, dep habarlaıdy QazAqparat.

Tórt kúnge sozylatyn spartakıadanyń basty maqsaty – jasóspirimderdi naǵyz áskerı ómirdiń qyr-syrymen tanystyryp, patrıottyq tárbıege baǵyttalǵan jarystar uıymdastyrý.

Joba uıymdastyrýshylary – Aqtóbe oblystyq jastar resýrstyq ortalyǵy jáne Aqtóbe qalasynyń bilim bólimi qyzmetkerleriniń aıtýynsha, jalpy spartakıada pnevmatıkalyq vıntovkadan nysana kózdep atý, bıik kermege tartylý, 1000 metr kross júgirý baǵyttary boıynsha ótedi.

Sonymen qatar uıymdastyrýshylardyń málimetinshe, komandalyq jarys nátıjesinde apta sońynda ár baǵyt boıynsha 1, 2, 3 oryn jeńimpazdary anyqtalyp, baǵaly syılyqtar tabystalady.

Jalpy jarysqa 18-22 qyrkúıek aralyǵynda oblys boıynsha 105 mektepten 1 000-nan asa oqýshy qatysady.