Aqtóbede aýyl ákimi óz-ózine qol jumsamaq boldy

AQTÓBE. KAZINFORM — Alǵa aýdany Bestamaq aýyldyq okrýginiń ákimi óz-ózine qol jumsamaq boldy. Qazir sot aldy tergeý júrip jatyr. 

Oqıǵa 7 shilde kúni boldy. Alǵa aýdanynyń ákimi Aslanbek Shúıinshalıevtiń aıtýynsha, Bestamaq aýyldyq okrýginiń ákimi Qanat Dáýletalın 30 maýsym kúni eńbek demalysyna shyǵyp ketken. Oqıǵa da sol kezde bolyp tur. Aýdan ákimi telefon arqyly baılanysa almaǵanyn, aýrýhanada jatqanyn estigenin ǵana málimdedi.

— 7 shildede Alǵa aýdandyq aýrýhanasyna 47 jastaǵy er adam tústi. Qazir jaǵdaıy turaqty, jalpy palatada em qabyldap jatyr. Qazaqstan Respýblıkasynyń «Halyq densaýlyǵy jáne densaýlyq saqtaý júıesi týraly» Kodeksiniń 95-babyna sáıkes dıagnoz dárigerlik qupııa. Kelisimsiz jarııalaýǵa tyıym salynady. Naýqas kelisim bermedi, — dep habarlady Aqtóbe oblystyq densaýlyq saqtaý basqarmasynyń baspasóz qyzmeti.

Al Aqtóbe oblystyq polıtsııa departamenti óz-ózine qol jumsaýǵa oqtalý deregi boıynsha sot aldy tergeý júrip jatqanyn habarlady. Qazir mán-jaı anyqtalyp jatyr.

Buǵan deıin habarlaǵanymyzdaı, Aqtóbede sýıtsıd jasaǵan oqýshynyń ólimine qatysty is boıynsha tergeý júrip jatyr.