Aqtóbede ata-analar balalaryn apatty mektepke jiberýden bas tartty
Temir most aýylynyń turǵyndary búgin oblys ákimdigine jınalyp, óńir basshysy Ońdasyn Orazalınmen kezdesýdi surady. Olar 1936 jyly temirjol vokzaly retinde salynǵan ǵımarattyń qaýipti ekenin, osyǵan qaraı eki kún boıy balalaryn sabaqqa jibermegenin aıtty.
«Mektebimiz apatty jaǵdaıda tur. Sondyqtan men qazir balalarymdy sabaqqa jibere almaı otyrmyn. Tóbesi qulaıyn dep tur. Oshaq tartpaıdy, ot jaqsa janbaıdy. Ys basyp ketedi. Men balam ýlanyp qalady dep qorqamyn. Oqys jaǵdaı bolsa kim jaýap beredi?», - dedi aýyl turǵyny Gúlmıra Tólegenova.
Barlyǵy oblys ortalyǵyna 10-nan astam aýyl turǵyny keldi. Olar mekteptiń 9 jyldyq bolyp salynǵanyn qalaıdy.
«Muǵaljar aýdany, Temir most beketinen kelip turmyn. Bizge mektep kerek. Osy máseleni kóterip turmyz. Ózim temirjolshymyn, qazir zeınetke shyqtym. Úlken otbasymyz, nemerelerimniń segizi mektep jasynda. Olardyń jaqsy mektepte oqyǵanyn qalaımyn. Biz 9 jyldyq mektep bolsa deımiz. Qazirgi mekteptiń jaǵdaıy jaman. Apatty jaǵdaıda tur. Bul negizinde 1936 jyly salynǵan temirjol vokzaly. Qanshama adam kelip qarady, biraq oń shemimin kórmedim. Qazir aýylda 98 bala bar. Olardyń kóbi mektep bolmaǵan soń ár jerde júr», - aýyl turǵyny Raýshan Baıdılova.
Temir most aýylynda mektep salý máselesi 2017 jyly kóterilip, jobalyq-smetalyq qujat ázirlendi. Qazirgi kezde onyń merzimi ótip ketken.
«Temir most mektebiniń qurylysyna qajetti jobalyq-smetalyq qujat qaıta jasalady. Aıaqtalǵan soń qurylys jumystary bastalady. Bul birneshe saraptamadan ótýi kerek. Keıin bıýdjetten qarjy suraımyz, sosyn qurylys júredi. Burynǵy 200 mln teńge bolsa, qazir 360-400 mln tg bolýy múmkin», - dedi oblystyq qurylys basqarmasynyń basshysy Naǵymjan Aldııarov.
Keıin aýyl turǵyndarynyń aldyna oblys ákiminiń orynbasary da shaqty. Ol bıyl mektep qurylysy bastalsa da ony jańa oqý jylyna deıin aıaqtaý qıyn ekenin aıtty.
«Kóterip otyrǵan másele ózekti. Ol jerde 60 oryndy mektep salý jospary bar. Qazir jobalyq qujattamaǵa qaıtadan túzetý engizilip jatyr. Eń kóp degende úsh aı ýaqyt alady. Qujat qolǵa tıgende oblystyq bıýdjetten qarjy bólemiz. Qurylysty jyldyń aıaǵynda bastaıtyn bolamyz. Bıylǵy oqy jylynda aýdandyq bilim bólimi alyp bergen oqý ǵımaratynda bilimin jalǵastyrady», - dedi oblys ákiminiń orynbasary Bulbul Eleýsinova.