Aqtóbede anasy men úsh balanyń denesi tabyldy

AQTÓBE. KAZINFORM – Aldyn ala boljam boıynsha bir otbasyndaǵy tórt jan ıis tıip ýlanýy múmkin. Qazir tergeý júrip jatyr.

Aqtóbe qalasyndaǵy Almaty aýdanynda jeke úıden 1993 jylǵy áıel men onyń 2015, 2020 jáne 2023 jyly týǵan úsh balasynyń denesi tabyldy. Aqtóbe oblystyq PD bastyǵynyń orynbasary Áset Qalıevtiń aıtýynsha, oqıǵa búgin saǵat 12:00 shamasynda anyqtaldy.

- Aldyn ala málimet boıynsha, qaıǵyly oqıǵanyń sebebi tabıǵı gazdan ýlaný bolýy múmkin. Atalǵan derek boıynsha sotqa deıingi tergep-tekserý bastaldy. Oqıǵanyń barlyq mán-jaıyn jan-jaqty jáne obektıvti anyqtaýǵa baǵyttalǵan tergeý jáne protsessýaldyq is-sharalar júrgizilip jatyr. Túpkilikti qorytyndy saraptamalardyń nátıjesi boıynsha jasalady. Polıtsııa azamattardy tek resmı aqparat kózderine senýge jáne tekserilmegen málimetterdi taratýdan bas tartýǵa shaqyrady,- dep habarlady Áset Qalıev.

Qazirgi kezde jergilikti ákimdik komıssııa qurdy.

- Aqtóbe oblysynyń ákiminiń tapsyrmasymen jaǵdaıdy jan-jaqty zerdeleý úshin arnaıy komıssııa quryldy. Komıssııany Aqtóbe qalasynyń ákimi Azamat Beket basqarady. Komıssııa ýákiletti organdarmen ózara is-qımyl jasaı otyryp, tekserý júrgizip, tergeý qorytyndysy boıynsha tıisti sharalar qabyldaıdy. Qazirgi ýaqytta quzyrly organdar tarapynan tergeý amaldary bastaldy. Aqtóbe oblysynyń ákimdigi marqumdardyń týǵan-týystary men jaqyndaryna qaıǵyra kóńil aıtady. Jergilikti atqarýshy organdar tarapynan jerleý rásimin uıymdastyrýǵa kómek kórsetilip, sondaı-aq qajetti materıaldyq jáne áleýmettik qoldaý kórsetiletin bolady, - dedi Almaty aýdanynyń ákimi Rústem Óteshov.

Aıta keteıik, jeltoqsanda Atyraýda úsh adam gazdan ýlanyp, kóz jumdy.