Aqtóbede Álııa Moldaǵulova mýzeıi jańardy
AQTÓBE. KAZINFORM – Álııa Moldaǵulovanyń týǵanyna 100 jyl jáne Jeńistiń 80 jyldyǵyna oraı mýzeı ishi zamanaýı tehnologııalarmen qaıta jabdyqtaldy.
Munda kelýshilerdi endi vırtýaldy ekskýrsovod qarsy alady jáne ol 5 tilde sóıleıdi. Keıin arhıvter men izdeý jumystary kezinde tabylǵan qundy dúnıeni kórip, Álııa Moldaǵulovanyń hatyn oqıdy. Ol úshin jasandy ıntellekt, gologramma qoldanyldy.
- Álııa Moldaǵulovanyń ómiri men erlik jolyn qamtıtyn barlyq aqparat jańa tehnologııalar arqyly kórsetiledi. Arnaıy mamandar mýzeıdi jabdyqtap berdi. Bizdiń mindetimiz - osy tehnologııalar kómegimen kelýshilerge mol maǵlumat berý,- dedi Keńes Odaǵynyń batyry Álııa Moldaǵulova memorıaldy mýzeıiniń dırektory Janar Maqsutova.
Mýzeıde tsıfrlyq tehnologııa kómegimen dybys jáne beıne sátti paıdalanyldy. Munda Álııa turǵan úıdiń maketin, úı ishindegi jandardy kórýge bolady. Sonymen urys dalasyndaǵy erligi de kórsetiledi.
- №51 mektep-gımnazııasynda bilim alamyn. Mýzeıge kelip, kóp nárse bildim. Álııa Moldaǵulova týraly aqparatqa qanyǵyp, ómiri jáne erlik jolymen tanystym. Munda jańa tehnologııalardy sátti paıdalanǵan. Bul meniń zamandastarym úshin qyzyqty dep oılaımyn,- dedi mektep oqýshysy Qaıratbek Laýbaı.
Aıta keteıik, mýzeı ashý týraly sheshim 1980 jyly qabyldandy, 1985 jyly resmı túrde ashyldy. Al 2015 jyly munda jóndeý jumysy júrgizilgen. Qazirgi kezde mýzeıde 11 myńnan astam eksponat bar. Jyl saıyn mýzeıge 40 myńnan astam adam kelip, túrli sharalarǵa qatysady.
Buǵan deıin habarlaǵanymyzdaı, Á.Moldaǵulovanyń 100 jyldyǵyna jáne Jeńistiń 80 jyldyǵyna arnalǵan «Álııa» tolyqmetrajdy kórkem fılmi 2025 jyldyń mamyr aıynda jaryqqa shyǵady.
Aqtóbede Álııa Moldaǵulovanyń týǵan aýyly Bulaqta, sol mańdaǵy Álııa aýylynda áleýmettik nysandar jańǵyrtylyp jatyr.
