Aqtóbede alǵashqy akvapark ashyldy
Aqtóbe qalasynyń ortalyǵynda otbasylyq demalys orny ashyldy. Akvaparkte úsh basseın bar. Balalar men jasóspirimder, eresekter jazdyń ystyǵynda tynyǵyp, bos ýaqytyn tıimdi ótkize alady.
«Memleket basshysy Nursultan Nazarbaev árdaıym balalarǵa kóńil bólip, olardyń bilimi men demalysyn tıimdi uıymdastyryp otyr. Bıyl Aqtóbede Balalar jyly jarııalandy. Astana kúnine oraı, «Baqytty bala» jobasy aıasynda avkapark iske qosyldy. Bir jyl buryn ınvestorǵa usynys jasap, demalys ornyn salý jóninde aıtqan edik. Bul balalardyń demalysy úshin eń jaqsy oryn bolady», - dedi oblys ákimi Berdibek Saparbaev.
Aıta keteıik, akvapark qysy-jazy jumys isteıtin bolady. Sonymen qatar, bul aýmaqta 15 qabatty qonaqúı salynady. Joba quny - 12 mıllıard teńge. Búgin akvaparktiń ashylýy kezinde áleýmettik jaǵdaıy tómen, ata-ananyń qamqorlyǵynsyz qalǵan balalarǵa 5 ret tegin kirýge múmkindik beretin arnaıy sertıfıkat tapsyryldy. Al ózge turǵyndar úshin bul qyzmet 5 myń teńge bolady. 7 jasqa tolmaǵan balalar tegin demalady. 
