Aqtóbede ákimdik pen saıabaqtyń burynǵy ıesi áli sottasyp júr
AQTÓBE. KAZINFORM — Aqtóbede ǵasyrlyq tarıhy bar Pýshkın atyndaǵy saıabaqty ákimdik menshigine alǵanymen, múlki burynǵy ıesine tıesili. Jer men múlikke qatysty iste ortaq kelisimge kele almaǵan eki tarap áli sottasyp júr.
Aqtóbe qalasynyń eski bóliginde ornalasqan Pýshkın atyndaǵy saıabaq byltyr ákimdik menshigine ótti. Tek jer telimine ǵana ákimdik ıelik etedi. Al múlki áli de jekeniń menshiginde.
— Sot sheshimimen jer qala ákimdiginiń ıeligine ótti. Burynǵy ıesi dúńgirshekterden, attraktsıondardan jáne basqa da múlikterden ishin tolyq bosatpaǵandyqtan, ol múlikterden bas tartpaǵandyqtan, demontajdap bosatýdy talap etý úshin qalalyq turǵyn úı-kommýnaldyq sharýashylyq bólimi sotqa aryzdandy. Qazir sol eski múlikterin alyp ketsin degen talapty qoıýǵa qatysty sot isi júrip jatyr. Sondyqtan, ishinde eshqandaı jumys júrip jatqan joq.
Parkti jańǵyrtý úshin demeýshiler esebinen jobalyq-smetalyq qujattamasy ázirlenip jatyr. Joba ázir bolǵan soń ony júzege asyrý úshin bıýdjetten qarajat suralady, — dep habarlady Aqtóbe qalasy ákiminiń baspasóz qyzmeti.
Rasymen de Aqtóbe oblysy mamandandyrylǵan aýdanaralyq ekonomıkalyq sotynda qalalyq turǵyn úı-kommýnaldyq sharýashylyq bóliminiń aryzy boıynsha is qaraldy. Ákimdik «A. S. Pýshkın atyndaǵy qalalyq saıabaq» JShS-inen jer telimin bosatýdy, demontaj jasaýdy talap etti. Іs materıalyna súıensek, ákimdik bıyl naýryzda aýmaqty bosatý týraly habarlama jiberdi. Biraq seriktestik basshysy bul eskertýge qulaq aspaǵan. Múliktiń bir bóligi sot sheshiminen soń alynyp tastaldy.
Alaıda keıbiri tizimge enbeı, ári kúnge deıin saıabaqty attandyrýǵa kedergi keltirip tur. Sottaǵy qujatta «Kóńildi átkenshek», «Romashka» attraktsıondary, sahna, sahna mańyndaǵy 64 dana oryndyq, 20 qoqys jáshigi, 19 oryndyq, 1 qoqys konteıneri alańy, 4 konteıner, 6 saýda pavılony, 1 kassa dúńgirshegi, 3 palatka, 2 paravoz, eskertkish te bar.
Bul zattar saıabaqty abattandyrý jumysyna kedergi keltirip turǵanyn alǵa tartqan ákimdik sottan 5 kún ishinde bosatý týraly sheshim shyǵarýdy surady. Al jaýapker aryzdy qaraýsyz qaldyrý qajet dep otyr. Jaýapkerdiń málimetine súıensek, jer telimi men onyń ishindegi múlik «A. S. Pýshkın atyndaǵy qalalyq saıabaq» JShS-ne tıesili. 1992 jyldyń aqpan aıynda jekeshelendirgenin, 1996 jylda alǵan jer aktisi bar ekenin aıtty. Al aýmaqty ıesiz dep aıtýǵa kelmeıtinin, munda 600 túp aǵash otyrǵyzǵanyn jetkizdi. Jaýapker sot talqylaýyna qosylmaǵan. Sot qujattardy saralaı kele 2021 jyldyń maýsym aıyndaǵy sot sheshimine sáıkes «A. S. Pýshkın atyndaǵy qalalyq saıabaq» JShS-i Aqtóbe qalasy Shernııaz kóshesinde ornalasqan aýmaqty bosatýy, demontaj jasaýy tıis.
Aqtóbe qalalyq turǵyn úı-kommýnaldyq sharýashylyq bólimi buǵan deıin de sotqa dál osyndaı aryz túsirgendikter sot Azamattyq protsessýaldyq kodekstiń 277-baby 3-tarmaqshasy negizinde sot isti qysqartty. Sebebi sol kezde sot jaýapkerdi jer ıesi ákimdik talabyna sáıkes demontaj jasaýdy mindettedi. Sot sheshimi zańdy kúshine endi.
Eske salsaq, bıyl qańtarda Aqtóbede ǵasyrdan astam tarıhy bar saıabaqtaǵy attraktsıon bólshekteldi. Demalys ornynyń tarıhı kelbeti saqtalyp, jańǵyrtylady degen jospar bar.
Ázirge munda eshteńe de ózgermedi.