Aqtóbede aqbókenniń múıizin kesip alǵan brakonerler ustaldy
15 aqpan kúni Aqtóbe oblysy Áıteke bı aýdanynyń krımınaldyq jáne tabıǵatty qorǵaý polıtsııa bóliminiń qyzmetkerleri «KamAZ» avtokóligin toqtatty. Onyń ishinde júrgizýshi men eki jolaýshy bolǵan. Barlyǵy - Áıteke bı aýdanynyń turǵyndary. Avtokólikti tekserý kezinde 6 dana aqbóken múıizi, úsh qoıan jáne ara tabylyp, tárkilendi. Kúdiktiler jaıylymnan 100 shaqyrym jerde aqbóken múıizin keskenin aıtty.
«Tirkelgen derekke qatysty Qylmysty kodekstiń «Ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý» baby boıynsha qylmystyq is qozǵaldy. Tergeý amaldary júrip jatyr. Kúdiktiler ýaqytsha tergeý ızolıatoryna qamaldy», - dep habarlaıdy oblystyq PD baspasóz qyzmetiniń jetekshisi Erbolat Sarqulov.