Aqtóbede Ábish Kekilbaev atyndaǵy mekteptiń ashylýyna jazýshynyń jubaıy men balasy qatysty
Táýelsizdik kúnine oraı Aqtóbede mektep ashylyp, bilim ordasyna qoǵam qaıratkeri, jazýshy Ábish Kekilbaevtyń esimi berildi. Bul batys óńirindegi zamanaýı aqparattyq tehnologııalardy tereń oqytatyn alǵashqy mektep-lıtseı bolmaq. Mekteptiń ashylýyna Aqtóbe oblysynyń ákimi Berdibek Saparbaev, Ábish Kekilbaevtyń jubaıy men uly - Klara Jumabaeva men Dáýlet Kekilbaev qatysty.
«Ábish Kekilbaev Qazaqstannyń zamanaýı mádenıetinde erekshe oryn alady. Onyń uly shyǵarmalary álemniń ondaǵan tiline aýdaryldy. Ol jazýshy ǵana emes, memlekettiń qalyptasýy men nyǵaıýyna, halyqtyń birligin damytý úshin kóp nárse jasaǵan daryndy saıası qaıratker. Maǵan onymen tanys bolý jáne kóp jyldar boıy birge jumys isteý baqyty buıyrdy. Ol - júregi keń jan. Onyń murasyn óskeleń urpaqqa tabys etý - paryzymyz. Balalar osyndaı uly adamdardy úlgi tutyp, ómir súrýdi úırenýleri kerek. Sondyqtan da jańa mektep Ábish Kekilbaevtyń qurmetine onyń esimimen ataldy», - dedi oblys ákimi B. Saparbaev.
Aqtóbe qalasyndaǵy Áýe qalashy aýdanynda ornalasqan mektep 900 oqýshyǵa arnalǵan. Biregeı mektep qurylysyna 1,6 mıllıard teńge jumsaldy. Munda 40 oqý kabıneti, ınformatıka, fızıka, hımııa jáne bıologııa, aǵylshyn tili pánderine arnalǵan arnaıy synyp bar. 1-7 synyp oqýshylary aqparattyq tehnologııa negizderin úırenedi, 7 synyptan bastap arnaıy baǵdarlamalaý tiliniń kýrstary oqý josparyna engiziledi.
Sondaı-aq, robot tehnıkasy men 3D-prıntıngti tereń oqytý qaraldy. Ashylý rásimi kezinde Ábish Kekilbaevtyń qurmetine memorıaldy taqta qoıyldy.
«Eske alǵany úshin aqtóbelikterge alǵys aıtamyn. Ábish 77 jasynda ómirden ótti, biraq artynda úlken iz qaldyrdy. Onyń basty tilegi - óz eliniń baı, beıbit ári gúldengenin kórý edi. Búginde biz sondaı ýaqytta ómir súrip jatyrmyz. Balalar, osy syıdy baǵalaı bilińizder. Úlkenderdiń sizder úshin jasaǵan isterin baǵalaı bilińizder, osyndaı ıgi isterdi jalǵastyryp, arttyrýǵa umtylyńyzdar», - dedi Ábish Kekilbaevtyń jubaıy Klara Jumabaeva.
