Aqtóbede 9 aılyq balada menıngıt dıagnozy rastaldy

AQTÓBE. QazAqparat - Aqtóbede 9 aılyq sábıden menıngokokk juqpasy anyqtaldy. Sábı qazir aýrýhanada em qabyldap jatyr, dep habarlaıdy QazAqparat tilshisi Óńirlik kommýnıkatsııalar qyzmetine silteme jasap.

Qoǵamdyq densaýlyq saqtaý komıtetiniń Aqtóbe oblysy boıynsha departamentiniń basshysy Nursulý Berkimbaevanyń aıtýynsha, sábı oblystyq klınıkalyq juqpaly aýrýlar aýrýhanasynyń jansaqtaý bólimshesine «jedel respıratorly-vırýstyq ınfektsııa» dıagnozymen jatqyzylǵan.

«Balada «menıngokokk juqpasy» dıagnozy zerthanalyq túrde rastaldy. Naýqas emdelý kýrsynan ótýde. Sábıdiń jaǵdaıy turaqty, jaqsarǵany baıqalady. Onymen aralasqan týystary tekserildi, tekserý nátıjeleri teris. Oǵan medıtsınalyq baqylaý ornatyldy. Epıdemııaǵa qarsy sharalar tolyq kólemde júrgizildi», - dedi Nursulý Berkimbaeva.

Aıta keteıik, jyl basynan beri óńirde menıngokokk juqpasy úsh adamnan anyqtaldy.

«Dertke shaldyqqan adamnyń barlyǵy emdeldi. Naýqastardyń medıtsınalyq uıymdarǵa ýaqytyly barýynyń arqasynda barlyq jaǵdaılar jaqsy aıaqtaldy. Osy adamdarmen baılanysta bolǵan 180 adam tekserildi. Tekserý nátıjeleri boıynsha tasymaldaýshylar tirkelgen joq. Menıngokokk ınfektsııasy úsh oqıǵanyń 2-eýinde zerthanalyq túrde rastaldy, bireýine dıagnoz klınıkalyq málimetter negizinde qoıyldy. Qazirgi kezde ahýal turaqty», - dedi Nursulý Berkimbaeva.