Aqtóbede 7200 páter paıdalanýǵa beriledi

AQTÓBE. QazAqparat – Aqtóbe oblysynda 3 myńnan astam páter qoldanysqa berildi. Bul týraly óńirlik kommýnıkatsııalar qyzmetinde ótken baspasóz máslıhatynda oblystyq qurylys, sáýlet jáne qala qurylysy basqarmasynyń basshysy Baıron Óteshov aıtty, dep habarlaıdy QazAqparat tilshisi.

Turǵyn úı qurylysyn damytý jónindegi memlekettik baǵdarlama aıasynda osy jyldyń qańtar-tamyz aılarynda barlyq qarjylandyrý kózderinen 480,9 myń sharshy metr turǵyn úı nemese 3186 páter paıdalanýǵa berildi.

«Bıyl aýmaǵy 1 mıllıon sharshy metrden astam turǵyn úı, ıaǵnı, 7200 páter paıdalanýǵa beriledi. Onyń ishinde Turǵyn úı qurylys jınaq banki jelisi boıynsha aýmaǵy 49 myń sharshy metr bolatyn nesıelik turǵyn úı qarastyrylǵan. Páter «Nur-Aqtóbe» yqsham aýdanynan berildi. Sonymen birge satyp alý quqyǵynsyz jalǵa beriletin 159 páter bar. Bul kópbalaly otbasylarǵa tıesili. Budan basqa, Aqtóbe qalasyndaǵy memlekettik emes kásiporyndardyń qarajaty esebinen 191,3 myń sharshy metr kommertsııalyq turǵyn úı nemese 1829 páter jáne Aqtóbe qalasy men oblys aýdandaryndaǵy halyqtyń jeke qarajaty esebinen 4351 úı paıdalanýǵa beriledi», - dedi oblystyq qurylys, sáýlet jáne qala qurylysy basqarmasynyń basshysy Baıron Óteshov.

Aıta keteıik, «Nurly jer» baǵdarlamasy sheńberinde ınjenerlik-kommýnıkatsııalyq ınfraqurylym qurylysyna 9096,3 mln teńge, onyń ishinde respýblıkalyq bıýdjet qarajaty esebinen – 7892,3 mln teńge, jergilikti bıýdjet esebinen – 1325,3 mln teńge qarastyrylǵan. Bul qarajatqa 518 shaqyrymdyq ınjenerlik jeli tartyldy.