Aqtóbede 58 eldimeken sý basý aýmaǵyna tur
AQTÓBE. KAZINFORM – Aqtóbe oblysynda 58 eldimeken qaýipti aýmaqta tur. Qazirgi kezde 199 evakýatsııalyq pýnkt ázirlendi.
Aqtóbede búgin «Kóktem» oqý-jattyǵýy ótti. Oblystyq TJD men azamattyq qurylym barlyq tehnıkasy men adamdardyń ázirligin kórsetip, pysyqtady. Qalada aryqtar tazartyldy.
- Oqý-jattyǵý kezinde 61 is-shara ótkiziledi. Onyń 10-y Aqtóbe qalasynda. Qazgıdromettiń boljamy boıynsha, bıyl qar jamylǵysy byltyrǵyǵa qaraǵanda kóbirek, biraq tyǵyzdyǵy, ylǵaldylyǵy az. Degenmen naqty aqparat naýryzda belgili bolady. Yrǵyz, Qobda jáne Oıyl aýdandary qaýip tóndiredi. Oıyl aýdanynda kópir áli de jóndelmegen. Oblys boıynsha 2800-den astam adam daıyn. Olar TJD, jergilikti atqarýshy organ, áskerı bólimder, polıtsııa qyzmetkerleri. Qorda 100-den astam júzý quraly, 38 myń qap ınertti materıal ázir, - dedi Aqtóbe oblystyq TJD basqarmasynyń bastyǵy Aslan Arzymbetov.
Aqtóbe oblystyq TJD baspasóz qyzmetiniń habarlaýynsha, 9 jedel avtomobıl, 2 kvadrotsıkl, 15 motorly úrlemeli qaıyq, 340 sý ótkizbeıtin kombınezon, 44 tasymaldaý motopompasy, 3 tirkeme motopompasy, 1 súńgýir avtomobıli, 2 qutqarý qaıyǵy, 14 súńgýirlerge arnalǵan tynys alý apparaty, 2 ushqyshsyz ushý apparaty satyp alyndy. Bul daıyndyqqa jergilikti bıýdjetten 420 mln teńgeden astam qarjy bólingen. Al respýblıkalyq bıýdjet esebinen 4 jedel kólik, 2 jol talǵamaıtyn kólik satyp alyndy. Oǵan 396,4 mln teńge qarjy jumsaldy.
- 2024 jyly memlekettik materıaldyq rezervten 4 tehnıka (vahta, samosval, avtokran, avtobýs) bronnan shyǵarylyp, departamenttiń balansyna berildi. Búgingi tańda oblys boıynsha 66 myńnan astam adam turatyn 58 eldimeken (14 216 úı) sý basý aýmaǵynda tur. Onyń ishinde 9 eldimekende (1 263 úı, 5 735 adam) sý basý qaýpi joıyldy. Al 14 eldimekende (6 856 úı, 29 650 adam) qaýip barynsha azaıtyldy. Degenmen 35 eldimekende (6 097 úı, 31 202 adam)qaýip saqtalǵan. Yrǵyz, Áıteke bı, Qobda, Temir, Oıyl aýdandarynda qalqan bógetterin salý jáne rekonstrýktsııalaý jumystary júrgizildi. Oǵan 7,3 mlrd teńge (jergilikti bıýdjetten 3,3 mlrd teńge, «Demeý-Qazaqstan» qorynan 4 mlrd teńge) qarastyryldy, - dep habarlady oblystyq TJD baspasóz qyzmeti.
Aıta keteıik, qazirgi kezde «Kósem» bógetin qalpyna keltirý jumysy júrgizilip jatyr. Bul Alǵa aýdany Eset batyr aýylynda. Sonymen birge Áıteke bı aýdany Áıke aýylynda «Tereńsaı», Oıyl aýdany Qaratal aýylynda «Qaratal» qorǵanys bógeti qalpyna keltirildi. Óńirde syıymdylyǵy 35 myń adamǵa arnalǵan 199 evakýatsııalyq pýnkti daıyndaldy.
Eske salsaq, byltyr Aqtóbede 3500 úıdi sý basty. Óńirde barlyǵy myńnan astam úı jaramsyz bolyp, teń jartysy salyndy. Aqtóbe qalasynda sý tasqyny kezinde 191 úı apatty dep tanyldy. Bıyl úılerdi súrýge bıýdjetten qarjy bólinedi.
