Aqtóbede 400-ge jýyq adam ózen men sý qoımasy jaǵasyndaǵy qaýipsizdikti qamtamasyz etedi

AQTÓBE. KAZINFORM - Ózenderdiń qaýipti aýmaqtaryna 120 belgi ornatylady. Jaǵalaýlarda polıtsııa, tótenshe jaǵdaılar qyzmeti men eriktiler baqylaý júrgizedi.

Aqtóbede sýǵa shomylý maýsymy 1 maýsym kúni bastalady. Ol úshin sý aıdyndaryn tekserý, sý tabanyn qarap, tazartý jumysy júrgiziledi. Oblystyq tótenshe jaǵdaılar departamenti bastyǵynyń mindetin atqarýshy Aıbat Jańabergenovtiń aıtýynsha, 12-17 mamyr aralyǵynda sý aıdynynyń túbin tekserý jáne tazalaý jumystary júrgizilese, 20-21 mamyrda jaǵajaılarda kezekshilik etetin qutqarýshylar oqytylady. Bıyl óńirde shomylýǵa arnalǵan 64 oryn bolady. Kásipkerler sý túbin tekserý úshin ótinish berip úlgerdi. 

- Shomylý maýsymyna daıyndyq úshin aýdandarda qaıyqtar, qutqarý quraldaryn jáne qaýipsizdik týraly kórneki materıaldar satyp alynady. Shomylýǵa qaýipti jerlerge erekshe nazar aýdarylǵan. Oblysta sýǵa túsýge tyıym salynǵan 206 ýchaske bar. Byltyr sý qoımalarynyń janyna shomylýǵa tyıym salatyn 321 eskertý belgisi ornatylsa, bıyl taǵy 120 belgi qoıylady. Aýdan ákimderine túgendeý júrgizý jáne qajet bolǵan jaǵdaıda jadynamalyq belgilerdi jańartý tapsyryldy. Ózenderdegi qaýipsizdikti 367 adam baqylaıdy. Olardyń qatarynda TJ qyzmetkerleri, polıtsııa, áskerıleo jáne eriktiler bar. Sondaı-aq Aqtóbede sý aıdyndarynda 33 beınebaqylaý kamerasy ornatylǵan,- dep habarlady Aqtóbe oblysy ákiminiń baspasóz qyzmeti.

Aıta keteıik, byltyr Aqtóbede eki stýdent sýǵa ketti. Sol kezde medıtsınalyq ýnıversıtette qaraly kún jarııalandy.