Aqtóbede 4 jasar balany túlki tistep aldy

AQTÓBE. QazAqparat – Aqtóbe oblysy Qobda aýdanynda 4 jasar balany túlki tistep aldy. Dárigerler balaǵa em-dom jasap, epıdemıolog mamandarǵa habar berdi, dep habarlaıdy QazAqparat tilshisi.

Oqıǵa búgin Qobda aýdanynyń Jaryq aýylyndaǵy ózen mańynda boldy. Bala ata-anasymen birge júrgen.

Bala Qobda aýdandyq aýrýhanasyna jetkizildi. Onyń mańdaıy, qabaǵy men murny tistelgen. Oń jaq jambasy, aıaǵy da jaralanǵan. Balany túlki tistep alǵan eken. Olar túlkini ustap, óltirip tastaǵan. Qazirgi kezde balanyń jaǵdaıy jaqsy. Dárigerler jarasyn tigip, tańyp berdi. Sonymen birge, antırabııalyq vaktsına egildi. Aqtóbe oblystyq medıtsına ortalyǵyndaǵy balalar travmatologi telefon arqyly habarlasyp, keńes berdi. Habardy shuǵyl túrde epıdemıolog mamandarǵa jetkizdik

, - dedi oblystyq densaýlyq saqtaý basqarmasynyń basshysy Rústem Isaev.

Eske salsaq, Alǵa aýdanyna qarasty Marjanbulaq aýylyndaǵy sharýa qojalyǵynda iri qaradan qarasan aýrýy anyqtaldy. «Alǵa aýdanynyń Marjanbulaq aýyldyq okrýginiń «Sarym» sharýa qojalyǵyndaǵy iri qara maldardyń arasynda qarasan juqpaly aýrýynyń anyqtalýyna baılanysty shekteý is-sharalary belgilensin», - delingen Ashyq NQA portalynda jarııalanǵan Marjanbulaq okrýginiń ákimi Meıirjan Asqarulynyń sheshim-jobasynda. Málim bolǵandaı, 9 maýsym kúni atalǵan qojalyqtaǵy 1,5 jasar iri qaranyń óleksesin zertteý nátıjesinde odan qarasan anyqtalǵan.