Aqtóbede 4 jasar bala sýǵa batyp ketti

AQTÓBE. KAZINFORM – Balanyń denesin súńgýirler 2 metr tereńdikten alyp shyqty.

Aqtóbe qalasyndaǵy Elek ózeni boıynda ornalasqan demalys oryndarynyń birinde qaıǵyly jaǵdaı tirkeldi. Keshe saǵat 19:10–da 112 qyzmetine qońyraý shalyp, kómek suraǵandar 4 jasar balanyń sýǵa batyp ketkenin habarlaǵan.

— Jedel qutqarý jasaǵynyń súńgýirler toby balanyń denesin saǵat 19:40–ta alyp shyqty. Bala jaǵadan 5 metr qashyqtyqtan, 2 metr tereńdikten tabyldy, — dedi Aqtóbe qalasynyń TJB qyzmetkeri Amangeldi Bekzat.

Byltyr Aqtóbede 13 adam sýǵa batyp ketti. Onyń 9-y kámelet jasqa tolmaǵan.

Aıta keteıik, Ertis ózeninde sýǵa batyp ketken er adamnyń denesi bir aıdan soń tabyldy. Marqumnyń denesi oqıǵa bolǵan jerden 150 kılometr qashyqtyqta anyqtaldy. Ony Jelezın aýyly mańynda jergilikti turǵyndar baıqap qalǵan.