Aqtóbede 24 adamdy kene shaqty

AQTÓBE. KAZINFORM – Aqtóbe oblysynda 24 adamdy kene shaqty. Epızootııalyq baqylaý maqsatynda qazir kene jınaý jumysy júrip jatyr.

Aqtóbede kene shaqqan 24 adam dáriger kómegine júgingen. Olardan aýrý belgileri anyqtalmady. 

- Kene shaqqanda týlıaremııa, Kongo-qyrym qandy bezgegi aýrýlary juǵýy múmkin. Aqtóbe oblysynyń aýmaǵy Kongo-qyrym gemorragııalyq qyzbasy, búırek sındromdy gemorragııalyq qyzbasy boıynsha endemııalyq aımaqqa jatpaıdy. Degenmen Alǵa, Áıteke bı, Yrǵyz, Qobda jáne Oıyl aýdandarynda týlıaremııanyń tabıǵı oshaqtary bar. Barlyǵy 38 eldimeken osy aýmaqta ornalasqan. Sondyqtan epozootııalyq baqylaý maqsatynda kene jınalyp, zertteledi. Qazirgi kezde 1100 kene jınaldy. Osy aýmaqta óńdeý jumysy da júredi,- dedi Aqtóbe oblystyq sanıtarııalyq-epıdemıologııalyq baqylaý departamenti bóliminiń basshysy Týǵanaı Nurǵalıeva. 

Kene shaqqan adam turǵylyqty jeri boıynsha tirkelgen emhanaǵa barýy tıis. Sol kezde 21 kún baqylaýda bolady. Sonymen birge keneni zerthanaǵa tapsyrý kerek.