Aqtóbede 21 jastaǵy kýrsant kóz jumdy

M.Bókenbaev atyndaǵy Aqtóbe zań ınstıtýtynyń kýrsanty oblystyq ftızıopýlmonologııalyq ortalyqta kóz jumdy. Qazirgi kezde ólimniń sebebin anyqtaý úshin sot-medıtsınalyq saraptama taǵaıyndaldy, dep habarlaıdy Kazinform.

Kýrsant oblystyq ftızıopýlmonologııalyq ortalyqqa 21 qarasha kúni saǵat 15:29-da jetkizilgen. Birden jansaqtaý bólimine tústi. Oǵan eki jaqty pnevmonııa dıagnozy qoıylǵan. Qos ókpesiniń 80%-y zaqymdanǵan bolyp shyqty. 

- Infektsııalyq-toksıkalyq shok boldy. Infektsııalyq endokardıttiń aýyr túri edi. Ekijaqty ekssýdatıvti plevrıt te belgili boldy. Ol qan qusqan. Oǵan qosa jeńil dárejede qanazdyq dertine shaldyqqan. Birden em júrgizilip, kún saıyn konsılıým ótti. Oǵan shtattan tys bas pýlmonolog L.M.Tólegenova qatysty. Ókinishke qaraı naýqas 27 qarasha kúni kóz jumdy. Ókpe-júrek jetispeýshiliginen dep aıtylyp otyr. Kýrsanttyń denesi sot-medıtsınalyq saraptama ortalyǵyna berildi. Barlyǵy sol saraptamadan keıin naqty anyqtalady, - dedi oblystyq densaýlyq saqtaý basqarmasynyń basshysy Rústem Isaev. 

M.Bókenbaev atyndaǵy Aqtóbe zań ınstıtýty da bolǵan qaıǵyly jaǵdaıdy rastady. Degenmen aqparat taratpady.