Aqtóbede 15 synyp karantınge jiberildi

AQTÓBE. QazAqparat – Jańa oqý jyly bastalǵannan beri Aqtóbe oblysynda 800 baladan koronavırýs ınfektsııasy anyqtaldy. Qazirgi kezde óńirde 15 synyp karantınde, dep habarlaıdy QazAqparat tilshisi.

Aqtóbe oblysy boıynsha bir táýlikte 20 adamnan koronavırýs ınfektsııasy anyqtaldy. Onyń kóbi derttiń sımptomdy túrine shaldyqqan. Qazirgi kezde barlyǵy 154 adam em qabyldap jatyr. Onyń 21-i jansaqtaý bóliminde.

«Koronavırýs ınfektsııasyna shaldyqqan naýqastardyń tórteýi ókpeni jasandy jeldetý apparatyna qosylǵan. Balalar týraly aıtar bolsam, 36-y dárigerler baqylaýynda. Sonymen birge 14 júkti áıel de vırýs juqtyrǵan. Qazirgi kezde jaǵdaı turaqty. Infektsııalyq tósek-oryn júktemesi 42,2%, al jansaqtaý bólimindegi júkteme 38,2 % qurap otyr», - dedi oblystyq densaýlyq saqtaý basqarmasy basshysynyń orynbasary Bekbolat Іzbasarov.

Aqtóbede áli de 8 myńnan astam adam úı karantıninde.

«1 qyrkúıekten bastap búginge deıin mektepke deıingi mekemelerde tárbıelenetin 53 baladan vırýs anyqtaldy. Búginde barlyǵy 4 top karantıninde. Al 1 qyrkúıekten bastap 800 oqýshynyń boıynan vırýs tabyldy. Qazirgi kezde 15 synyp karantınge jiberildi», - dedi oblystyq sanıtarııalyq-epıdemıologııalyq baqylaý departamenti basshysynyń mindetin atqarýshy Gúlbaný Dáýletova.