Aqtóbe sý qoımalarynyń erigen qar sýyn qabyldaýǵa daıyndyǵy qandaı

AQTÓBE. QazAqparat – Aqtóbe sý qoımalarynda sý saqtaıtyn oryn jetkilikti. Qazirgi kezde ózenniń sý júrý arnalary da tazartylyp jatyr, dep habarlaıdy QazAqparat tilshisi.

Aqtóbe qalasy mańynda Aqtóbe jáne Sazdy sý qoımalary bar. Aqtóbe sý qoımasynyń syıymdylyǵy – 245 mln tekshe metr.

Áli 115 mln tekshe metr sý qabyldaýǵa bolady. Sazdy sý qoımasynyń syıymdylyǵy – 7,5 mln tekshe metr.

Qazir 3 mln tekshe metr sý bar. Al óńirdegi eń iri Qarǵaly sý qoımasynda 280 mln tekshe metr sý qabyldaýǵa bolady.

Qazir syıymdylyqtyń 185 mln tekshe metri bos.

Búgin Aqtóbe oblysynyń ákimi Eraly Toǵjanov Aqtóbe qalasynyń sý qoımalarynyń sý qabyldaýǵa daıyndyǵyn tekserdi.

«Sazdy sý qoımasynyń jobalyq qýaty – 7,5 mln tekshe metr, qazir sý qoımasy taǵy 4,5 mln tekshe metr sýdy qabyldaı alady. Muzdyń qalyńdyǵy - 85 santımetr. Turaqty baqylaý, qaýipsizdik máseleleri – nazarymyzda»,-dedi «Qazsýshar» RMK fılıalynyń dırektory Myrzabaı Nurtazın.

Nysandy qarap shyqqannan keıin oblys ákimi sý qoımasynyń aınalasyn qamystan tazartý sekildi tapsyrmalar berdi.

Sondaı-aq, óńir basshysy Jińishke ózeni arqyly ótetin paıdalanylmaǵan eski kópirdi buzý jumystarynyń barysyn tekserdi. Bes kún buryn bastalǵan jumys aıaqtalýǵa jaqyn.

Bul shara ózen arnasy arqyly erigen qar sýy men muzdyń kedergisiz ótýin qamtamasyz etedi.

Sóıtip jaqyn mańdaǵy baý-baqsha ujymdaryn sý basý qaýpinen saqtaıdy.

«Oblys ákimi ónerkásip aımaǵynda ornalasqan qar polıgonyn aralap kórdi. Munda Shanhaı aýmaǵynan shyǵarylǵan qar jınalady. Polıgon jer bederin eskere otyryp ornalasqan. Qar erise de aýmaqqa qaýip tóndirmeıdi. Nysandardy aralaý qorytyndysy boıynsha Eraly Toǵjanov sý tasqynyna qarsy shtab múshelerine sý tasqynynyń saldaryn boldyrmaý jáne tómendetý boıynsha monıtorıngti kúsheıtýdi tapsyrdy», - dep habarlady oblys ákiminiń baspasóz qyzmeti.