Aqtóbe óńirinde 27 aýylǵa gaz barady
AQTÓBE. KAZINFORM – Bıyl Aqtóbe oblysynda myń jarymǵa jýyq turǵyny bar Muǵaljar aýdanynyń Jaryq, Temir aýdanynyń Altyqarasý, Eńbekshi aýyldaryna gaz qubyry tartylady.
Bul týraly Energetıka jáne turǵyn úı-kommýnaldyq sharýashylyq basqarma basshysynyń orynbasary Nurshashqan Іzbasarova Aqtóbe óńirlik kommýnıkatsııalar qyzmeti alańynda ótken baspasóz konferentsııasynda aıtty. Onyń sózinshe, bıyl oblysta 27 eldi mekendi kógildir otynmen qamtý úshin 21 joba júzege asyrylyp jatyr. Onyń beseýi – byltyrǵy jyldan, 16-sy – jańa joba. Bul jobalar 2025 jyly eldi mekenderdiń 64 paıyzyn, sondaı-aq oblys halqynyń 97,2 paıyzy gazben qamtamasyz etýge múmkindik beredi.
«Keler jyly óńirimizde aýyldardy gazben qamtý baǵytynda birneshe joba júzege asyrylady. Máselen, bıyl «Qazaq Gaz Aimaq» aktsıonerlik qoǵamy oblystyq fılıalynyń ınvestıtsııalyq baǵdarlamasy aıasynda Muǵaljar aýdany Qojasaı aýylynda bastalǵan gaz qubyryn tartý jumystary keler jyly aıaqtalady. Sondaı-aq 2025 jyly oblysta 9 aýyl kógildir otynmen qamtylady. Búginde onyń úsheýiniń qujattary ázirlense, altaýynyń qujattary daıyndalyp jatyr», - deıdi Nurshashqan Іzbasarova.
«Samuryq-Qazyna» qory oblystaǵy 20 eldi mekendi gazben qamtamasyz etý maqsatynda 9,2 mıllıard teńge qarjy bólse, qosymsha 4 aýyldy kógildir otynmen qamtý úshin oblystyq bıýdjetten 365,2 mıllıon teńge bólingen.
Qazir oblysta Aqtóbe qalasy men oǵan irgeles jatqan eldi mekenderdi, sondaı-aq kásiporyndardy gazben jabdyqtaý maqsatynda «Buhara-Oral» magıstraldy gaz qubyrynyń úshinshi jelisin salý boıynsha jumystar júrgizilip jatyr. Bul maqsatqa 43,1 mlrdteńge qarjy bólingen. Bul joba qarasha aıynda aıaqtalmaq.
