Aqtóbe oblysynyń aýyldarynda qarapaıym dári-dármekter jetispeıdi
QR Parlamenti Senatynyń baspasóz qyzmetinen málim etkendeı, depýtattar Marat Taǵymov pen Muhtar Jumaǵazıev Aqtóbe oblysynyń Alǵa aýdanyndaǵy Úshqudyq, Tikqaıyń, Qaraqobda jáne Saryqoba aýyldarynda boldy. Onda aýyldardaǵy mektepterdiń jaǵdaıymen tanysyp, pedagogtarmen jáne oqýshylarmen kezdesti. Kezdesý barysynda pedagog mártebesin arttyrýǵa baılanysty máseleler men densaýlyq saqtaýdy damytýdyń 2020-2025 jyldarǵa arnalǵan memlekettik baǵdarlamasy týraly aıtyldy.
Úshqudyq aýylyndaǵy mádenıet úıiniń kovorkıng-ortalyǵynda jáne Tikqaıyń aýylyndaǵy orta mektep ǵımaratynda turǵyndarmen kezdesýler ótti. Turǵyndar aýyldyń qazirgi jaǵdaıy men tynys-tirshiligi jóninde jetkizdi.
Mektepke jınalǵan Tikqaıyń aýylynyń jergilikti turǵyndary 2020 jyly aýylǵa gaz keletinin, ol Tikqaıyń ómirin qatty ózgertetinin aıtty. Qazirgi kezde aýyldan adamdardyń kóshýi toqtaǵan.
Depýtattar Alǵa aýdanyndaǵy saparynyń sońynda 2017 jyldan bastap jumys istep kele jatqan sharýa qojalyǵynda boldy. Ábdirazaq Jaqannyń sharýashylyǵynda 350 jylqy, 270 asyl tuqymdy iri qara jáne 800 qoı bar.
«Jalpy, turǵyndarmen bolǵan barlyq kezdesýlerde medıtsınalyq qyzmet kórsetý sapasy, bilikti mamandardyń jetispeýshiligi, qarapaıym dári-dármektiń joqtyǵy, jedel dárigerlik kómek kórsetýdiń qoljetimsizdigi máseleleri kóterildi», - delingen palata aqparatynda.
Senatorlar M.Taǵymov pen M.Jumaǵazıev aýyldyq eldi mekenderge saparynyń qorytyndysy boıynsha Aqtóbe oblysynyń ákimi Ońdasyn Orazalınmen kezdesti. Senatorlar aýyldyq okrýgterge sapardyń qorytyndysy boıynsha óz pikirlerimen bólisip, aýyl turǵyndarynyń ómir súrý deńgeıi birtindep jaqsaryp kele jatqanyn, degenmen birqatar suraqtar áli de ózekti ekenin atap ótti. Oblys ákimi gazdandyrý, sýmen jabdyqtaý, eldi mekenderdi joǵary jyldamdyqty ınternetpen qamtý máseleleri basymdyqa ıe ekenin jáne birinshi kezekte sheshiletinin aıtty.
Senatorlar sondaı-aq oblys ákimi O.Orazalınniń tóraǵalyǵymen ótken «Nur Otan» partııasy fılıalynyń ǵımaratynda ótken keńeske de qatysty. Onda aımaqtyń agroónerkásip keshenin damytý jaıy talqylandy.
Keńes jumysyna Aýyl sharýashylyǵy mınıstrliginiń, damý ınstıtýttarynyń ókilderi, sharýa qojalyqtarynyń basshylary, aýylsharýashylyq taýarlaryn óndirýshiler qatysty.
Jergilikti kásipkerler, sharýa qojalyqtarynyń basshylary Aýyl sharýashylyǵy mınıstrligi men quzyretti organdardyń ókilderine ózderin tolǵandyryp júrgen suraqtaryn qoıdy. Asyl tuqymdy mal ákelý, aýyl sharýashylyǵynyń salalyq túrleri men qus sharýashylyǵyn damytý, sýbsıdııalaý mólsherin ulǵaıtý, jaıylymdardy bólý máseleleri ózekti máselelerdiń qatarynda boldy.
