Aqtóbe oblysynda bilim mekemelerin jóndeýge 4,5 mlrd teńge bólindi

AQTÓBE. QazAqparat – Aqtóbe oblysynda jańa oqý jylyna daıyndyq júrip jatyr. Bıyl barlyǵy 38 bilim berý mekemesine kúrdeli jóndeý júrgizý úshin qarjy bólindi, dep habarlaıdy QazAqparat tilshisi.

Balabaqsha, mektep, orta arnaýly bilim berý mekemeleriniń ǵımaratyn jóndeýge jergilikti bıýdjetten 4,5 mlrd teńge bólingen.

«Oblystyq bilim basqarmasy arnaıy jospar daıyndady. Josparǵa sáıkes oblysta 100-den astam bilim oshaǵy kúrdeli jóndeýdi qajet etedi. Barlyǵyn bir jylda jóndeý múmkin emes. Sondyqtan úsh jyldyq jospar boıynsha jobalaý-smetalyq qujattar daıyndalyp jatyr. Keler jyly da dál osylaı kúrdeli jóndeýdi jalǵastyramyz. Tizimge alynǵan bilim, tárbıe ordalarynyń bári eskirgen. Shatyrynan sý aǵady, edeni búlingen, jylý júıesi tozǵan. Sonymen birge barlyq mektepte kishigirim jóndeý jumysy aıaqtalýǵa jaqyn», - dedi Aqtóbe oblystyq bilim basqarmasynyń basshysy Joldas Batyrhan.

Aıta keteıik, jańa oqý jylynan bastap oqýshylar 1 maýsymǵa deıin bilim alady. Bul oqýshylar júktemesin azaıtýǵa múmkindik beredi.

«Sońǵy 2 jylda jazǵy mektep jobasy júzege asyrylyp keledi. Balalar 17 maýsymǵa deıin bilimin tolyqtyrdy, túsinbegen baǵdarlamalaryn ıgerdi. Tıimdiligi baıqaldy. Ata-analardy mazalaıtyn taǵy bir jaıt, oqýlyq. Oqýlyq satyp alýǵa 1,7 mlrd teńge qarjy bólindi. Baspahanamen kelisimshart jasalyp, qabyldaýǵa ázir otyrmyz. 20 tamyzǵa deıin oqýlyq jetkiziledi. Bıyl 2-synyp oqýlyǵy qaıta basylyp shyǵyp jatyr. Al ózgesine oqýlyqty erte úlestiremiz. Balalar demalysta daıyndalyp, tanysa alady», - dedi Joldas Batyrhan.

Aqtóbe oblysynda biryńǵaı mektep formasynyń úlgisi bolady. Keler jyly ony oblystyq bilim basqarmasy bekitip beredi. Bıyl 19 myńnan astam bala birinshi synypqa barady.