Aqtóbe oblystyq jedel járdem beketinde dárigerler jetispeıdi
AQTÓBE. KAZINFORM — Aqtóbe oblystyq medıtsınalyq jedel járdem beketinde kólikterdiń 30% jaramsyz. Oblysta 93 brıgada jumys isteý tıis bolsa, sonyń tek 52-si ǵana bar. Sonymen birge dárigerler jetispeıdi. Kazinform tilshisi túrik ınvestorlary salyp, keıin jergilikti ákimdik óz qolyna alǵan jedel járdem qyzmetiniń materıaldyq-tehnıkalyq jaǵdaıymen tanysyp qaıtty.
Aqtóbe medıtsınalyq jedel járdem beketiniń negizgi ǵımaraty — Altyn orda shaǵyn aýdanynda ornalasqan. 2017 jyly muny túrik ınvestorlary salyp, elimizde alǵash ret memlekettik-jekemenshik seriktestik arqyly salynǵan nysan qoldanysqa berildi. Sol jyly ınvestorlar jedel járdemge 16 Mersedes, 16 Nıva kóligin berdi.
Alaıda 5 jyl ótkenshe kólik satyp alynbaı, tehnıkanyń tozý kórsetkishi artty. Al 2022 jyly Aqtóbe oblystyq medıtsınalyq jedel járdem beketi oblystyq densaýlyq saqtaý basqarmasyna qaıta ótti. Sol jyly 52 kólik satyp alyndy.
— Aqtóbe medıtsınalyq jedel járdem beketinde 110 mashına bar. Onyń tek 72-si ǵana júrip tur. Qalǵan 38-i jaramsyz kúıge túsken, iske aspaıdy. 2022 jyly Hyundai markaly 35, JAC markasy 17 kólik satyp alyndy. Aqtóbe oblysynda 930 myń halyq bar desek, QR Densaýlyq saqtaý mınıstrliginiń buıryǵyna sáıkes 10 myń adamǵa 1 kólik bolýy tıis. 110 dep sanyn alar bolsaq, qajetti 93 kólik bar. Biraq onyń bári emes, tek 72-i júrip tur. Biz áli kúnge deıin osy 93 brıgadany jasaqtaı almaı júrmiz. Kólik kerek ári maman da tapshy. Bir jaǵynan shaqyrtýdyń tórtinshi sanaty emhanalarǵa berilgenin umytpaǵan jón. Olarda 41 brıgada, 41 mashına bar, — dedi Aqtóbe oblystyq medıtsınalyq jedel járdem beketi bas dárigeriniń ádistemelik jumystardy uıymdastyrý jónindegi orynbasary Gúljanat Kýshetova.
Jedel járdem brıgadasynda dáriger tapshy
Eki jyl buryn satyp alynǵan 52 kóliktiń ekeýi sanavıatsııaǵa berildi. Al 16-y aýdandarǵa bólindi. Munda kólikpen qatar dáriger mamandar jetispeıdi. Bul qazir ózekti másele bolyp tur.
— Bizde ıntensıvti terapııa brıgadasy men pedıatrııa brıgadasyna maman jetispeıdi. Qazirgi kúni áli de 10 pedıatr, 20 terapevt kerek. Al bizde bas dárigerdi qosqanda 47 dáriger bar. Sonda bizge áli 30 dáriger qajet. Medıtsınalyq oqý ornyn bitirgen kez kelgen maman munda kele almaıdy. Sebebi talap ózgerdi. Jádel járdem dárigeri mamanyn ǵana jumysqa ala alamyz. Ol úshin 5 jyl ınstıtýtta oqyp, eki jyl jalpy tájirıbeli dáriger mamandyǵyn, taǵy úsh jyl rezıdentýrada bilim alýy tıis. Demek 10 jyl oqyp kelgen maman ǵana jedel járdem dárigeri bola alady. Aqtóbede medıtsınalyq ýnıversıtet bolǵanymen, rezıdentýra joq, sondyqtan bizge mamandardyń jappaı kelýi toqtady. Qazir feldsherler ǵana kelip, solar jumys istep júr, — dedi Gúljanat Kýshetova.
Aqtóbe oblysynda bıyl taǵy 41 kólik satyp alynady. Demek kadr tapshylyǵy máselesi kún saıyn qordalana túsedi.
— Biz tek dárigerdi emes, feldsherlerdi de kóbeıtemiz. Biraq jalpy tájirıbeli dárigerge basymdyq beremiz. Olar balany da, eresekterdi de qarap, dıagnoz qoıady, kómek kórsetedi. Eger dáriger jetkilikti bolsa, pedıatrııa, ıntensıvti terapııa brıgadasy dep bólmeı, teń jumys isteı alatyn edi. Bizdiń jalaqyda aıyrmashylyq bar. Mamandar túngi aýysymda jumys istese eńbekaqy bólek esepteledi. Sonymen birge psıhoemotsıonaldy tólem bar, — dedi Gúljanat Kýshetova.
Qazirgi kezde oblystyq jedel járdem beketinde 47 dáriger, 441 feldsher, 212 júrgizýshi bar. Eger taǵy 41 kólik kelse, árqaısysyna 2 feldsherden, tórt aýysymda, ıaǵnı, 300-den astam maman qabyldanady.
— Munda jumys istegen mamandar zeınetke shyǵady, al onyń ornyn basatyn dáriger biren-sarań ǵana. 2015 jyly ǵana dárigerlerdiń jappaı kelgeni esimizde. Odan soń kúrt toqtady. Talap kúsheıdi, ol da durys shyǵar. Biraq biz úshin jergilikti medıtsınalyq ýnıversıtette rezıdentýra ashylýy tıis. Jastar Almaty, Astanada oqyǵanymen, bizge kelmeıdi ol jaqtan. Sondyqtan bir dáriger, bir feldsher shyǵýy tıis bolsa, qazir biz eki feldsher jiberemiz, — dedi Aqtóbe oblystyq medıtsınalyq jedel járdem beketi bas dárigeriniń ádistemelik jumystardy uıymdastyrý jónindegi orynbasary G.Kýshetova.
Mamandar jedel járdem beketinde de oqytylady
Aqtóbe qalasynda kúndelikti 36 brıgada jumys istep júr. Kún saıyn basym bóligi shaqyrtýǵa barady. Kadr jetispegen soń dáriger ornyna eki feldsher jiberiledi, onyń biri mindetti túrde uzaq jyldar boıy tájirıbe jınaǵan maman bolýy tıis.
Al balaǵa qaýip tónip, jol-kólik apatynda shuǵyl kómek kórsetý qajet bolsa, dárigerler mindetti túrde brıgada quramyna kiredi.
— Jedel járdem beketinde sımýlıatsııalyq ortalyq bar. Onda balalar reanımatsııasy, jalpy reanımatsııany oqytýǵa arnalǵan eki bólme qarastyrylǵan. Ortalyqqa manıkender satyp alyndy. Arnaıy manıken bolǵan soń quny qymbat qajetti qural-jabdyqqa jatady. Balalarǵa arnalǵan reanımatsııada shaqalaqtarǵa da kómek kórsetý jolyn úıretemiz. Sebebi jyl saıyn 50-60 bala úıde ómirge keledi. Sol kezde feldsherler abdyrap qalmaýy tıis. Ortalyqta júrgizýshi de biliktiligin jetildiredi, jolda júrý erejesin qosymsha úırenedi. Sonymen birge júrgizýshi alǵashqy medıtsınalyq kómek kórsetýge qabiletti, — dedi Gúljanat Kýshetova. Kez kelgen aqtóbelik osy beketke kelip, alǵashqy kómek kórsetý erejesin úırene alady. Ol aqyly qyzmetke jatady. Jalpy kómek kórsetý jolyn úırený quny 10 myń teńge bolsa, ózgesi 15 myń teńge bolyp beketilgen. Ázirge bul oqytý kýrstaryna suranys az.
Aıta keteıik, bıyl alǵashqy jartyjyldyqta 180 myńnan astam shaqyrtý túsip, jedel járdem brıgadasy onyń 168 myńǵa jýyǵyna bardy. Shaqyrtýdyń 2 paıyzǵa jýyǵy birinshi sanatqa jatady. Kóbi úshinshi jáne tórtinshi sanattyń úlesinde.
Sanavıatsııaǵa 138 shaqyrtý túsip, 75 ret ushýǵa múmkindik jasaldy. Ózgesine jedel járdem brıgadasy kólikpen bardy. Bıyl alǵashqy jartyjyltyqta sanavıtsııa mamandary 29 ota jasady.
Aýdan, aýyldardaǵy naýqastarǵa kóbine anestezıolog, akýsher-gınekolog, neonatolog, travmatolog, hırýrg jáne neırohırýrg barady.
Eske sala keteıik, buǵan deıin Qazaqstanda tórtinshi sanattaǵy jedel járdem táýlik boıy qyzmet kórsetpeýi múmkin ekeni habarlanǵan blolatyn.
