Aqtóbe oblysyndaǵy shaǵyn eldi mekenderdiń turǵyndary aýdan ortalyǵyna kóshýge daıyn
ASTANA. KAZINFORM – 2024 jylǵy 8 sáýirde vıtse-premer Serik Jumanǵarın sý tasqynynan eń kóp zardap shekken Aqtóbe oblysy Oıyl aýdanynyń turǵyndarymen kezdesti,dep habarlaıdy Úkimettiń baspasóz qyzmeti.
Oıyl aýdanynda barlyǵy 340 úıdi sý basqan, qazirgi ýaqytta 49 úı áli de sý astynda qalyp otyr. Eń kóp zardap shekken aýyl turǵyndary Oıyl aýylyndaǵy úsh evakýatsııalyq pýnktige ornalastyrylǵan. Vıtse-premer evakýatsııalyq pýnktilerdiń jaı-kúıin qarap, ondaǵy adamdardyń talap-tilekterin tyńdady. Olardy, eń aldymen, zalal keltirilgen baspananyń qarajatyn óteý tetigi, ony ádil baǵalaý, óz betinshe úı salý nemese aqshalaı ótemaqy alý múmkindigi sııaqty máseleler qyzyqtyrdy. Serik Jumanǵarın barlyq usynysty Úkimet deńgeıinde qarastyrýǵa ýáde berdi.
Sý tasqyny kezinde tolyǵymen sý basqan Ekpetal eldi mekenindegi 48 jáne Jańabastaǵy 19 úıdiń turǵyndary jańa úı salynyp berse, Oıyl aýdanynyń ortalyǵyna birjola kóshýge ázir ekenderin jetkizdi. Serik Jumanǵarın aýdan ákimi Asqar Qazybaevqa osy jáne basqa da zardap shekken eldi mekenderdiń turǵyndarymen kóshýdiń barlyq tetigi jáne múmkindikterin talqylaýdy tapsyrdy. Oıylda úı salýǵa daıyn, ınjenerlik ınfraqurylymy júrgizilgen jer ýchaskeleri bar.
Kelesi kezdesý Saraljyn aýyldyq okrýgindegi Shıkudyq aýylynyń turǵyndarymen boldy. Munda 200-ge jýyq adam turatyn 30 úı bar. Negizgi aınalysatyn qyzmet túri – mal sharýashylyǵy, iri qara mal ósiredi. Qazirgi kezde aýylǵa qatynas úzilgen, azyq-túlik, qajetti taýarlar, janar-jaǵarmaı tikushaqtar nemese qaıyqtarmen jetkizilýde. Aýylda azyq-túlik qory bar, elektr qýaty dızel generatorlary arqyly qamtamasyz etilip otyr. Shıqudyq turǵyndary vıtse-premerge aýyldy jaryq jáne sýmen jabdyqtaý máselesin sheshý, sý qubyryn aýyldan eki shaqyrym jerde ornalasqan qazirgi ýaqytta jumysy toqtap turǵan uńǵymaǵa deıin júrgizý týraly ótinishpen júgindi. Sondaı-aq turǵyndar aýylǵa jol salýdy surady. Oıyl aýdanynyń ákimi Asqar Qazybaev energııamen jabdyqtaý jelileri erigen qar sýy azaıǵan boıda qalpyna keltirile bastaıtynyn aıtty. Vıtse-premer kóterilgen basqa da máselelerdi aýdan jáne oblys basshylyǵynyń qaraýyna tapsyrdy.
Sonymen qatar vıtse-premer Oıyl ózeni arqyly ótetin, búginde jaramsyz bolyp qalǵan kópirdi qarap, sol jerde QazjolǴZI mamandarymen qalpyna keltirý jumystaryn tez arada bastaý múmkindikterin talqylady.
