Aqtóbe oblysyndaǵy 17 aýyl áli ınternet jelisine qosylmaǵan
AQTÓBE. KAZINFORM – Óńirde barlyǵy 294 aýylda ınternet bar. Onyń 24-i OneWeb spýtnıktik tehnologııasyna qosylǵan, ózgesi – mobıldi baılanys. Taǵy 17 aýyldy ınternetpen qamtý kerek.
Aqtóbede tsıfrlyq transformatsııa jáne IT-kadrlardy daıarlaý suraǵy qaraldy. Oblystyq tsıfrlyq tehnologııalar basqarmasynyń basshysy Áset Otarbaevtyń aıtýynsha, 2025 jyldyń qorytyndysy boıynsha 294 aýyl ınternetpen qamtylǵan. Onyń ishinde 270 eldimeken mobıldi baılanys, 24-i OneWeb spýtnıktik tehnologııasyna qosylǵan.
– 2026–2027 jyldary 206 aýylda turaqty joǵary jyldamdyqty ınternet úshin talshyqty-optıkalyq baılanys jelileri salynady. Al oblystyń 9 aýdanyndaǵy respýblıkalyq mańyzy bar avtojoldar boıynda 17 baılanys munarasy ornatylady, - dedi basqarma basshysy Áset Otarbaev.
Internet bilim berý, sport salasyndaǵy ashyqtyqty qamtamasyz etýi tıis. Oblysta «DaraBala» platformasyna 272,5 myńnan astam ata-ana, ıaǵnı, 356,2 myń bala tirkelgen. Júıe mekteptegi sabaqqa qatysymdy tirkeıdi jáne júktemege taldaý júrgizedi. Qazir sport mektepteri men sektsııalarǵa arnalǵan jańa modýl synaqtan ótkizilip jatyr. Al qoǵamdyq qaýipsizdikti qamtamasyz etý úshin 79 myńnan astam beınebaqylaý kamerasy ornatylǵan. Jedel basqarý ortalyǵyna 20 myń kameranyń jazbasy qosylǵan. Bul adamdardy tanýǵa, kólik nómirin anyqtaýǵa, órt shyqqanda jedel áreket etýge, quqyqbuzýshylyqty tirkeýge baǵyttalǵan. Jyl ishinde beınebaqylaý kamerasy arqyly 250 qylmys ashyldy.
– Óńirde jylyna 300–400 stýdentti oqytýǵa arnalǵan IT Park ashý josparlanyp otyr. Peer-to-Peer mektebi jáne 12–18 jas aralyǵyndaǵy jasóspirimderge arnalǵan TUMO Center ınnovatsııalyq ortalyǵy jumysyn bastaıdy. Oblys ákimi jekelegen jobalardan naqty nátıje beretin júıeli jumysqa kóshýti tapsyrdy. Interneti joq 17 aýyldyq eldimekendi qysqa merzimde turaqty ınternetpen qamtamasyz etý qajet ekenin aıtty, - dep habarlady Aqtóbe oblysy ákiminiń baspasóz qyzmeti.
Aqtóbede Tsıfrlyq transformatsııa jónindegi keńes te qurylady.
Aıta keteıik, Halyqqa qyzmet kórsetý ortalyqtary Tsıfrlyq keńsege aınalady. Bul týraly Úkimet otyrysynda Premer-mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıev aıtty. Sondaı-aq Memleket basshysy Qazaqstan Respýblıkasynyń Tsıfrlyq kodeksine qol qoıdy.