Aqtóbe oblysynda turǵynnan aqsha bopsalaǵan kúdiktiler ustaldy
AQTÓBE. KAZINFORM – Aqtóbe oblysy polıtsııa departamentiniń uıymdasqan qylmysqa qarsy kúres basqarmasy qyzmetkerleri arnaıy maqsattaǵy bólimshesiniń qatysýymen jedel aqparatty júzege asyrý barysynda aqsha bopsalady degen kúdikpen qylmystyq baǵyttaǵy jastar tobynyń ókilderin ustady.
Júrgizilgen tergeý barysynda ustalǵan azamattardyń eki jyl boıy jergilikti turǵynnan júıeli túrde aqsha bopsalap kelgeni anyqtaldy. Olar jábirlenýshini qorqytý jáne psıhologııalyq qysym kórsetý arqyly túrli qarjy uıymdarynan mıkrokredıtter rásimdeýge májbúrlegen.
Saldarynan jábirlenýshige keltirilgen jalpy materıaldyq shyǵyn 900 myń teńgeni qurady. Kúdiktilerdiń birine tıesili Mercedes avtokóligin tintý barysynda polıtsııa qyzmetkerleri úsh oqjatarymen birge pnevmatıkalyq avtomat, uıaly baılanys sıgnalyn buǵattaıtyn qurylǵy, jınalmaly pyshaq tárkiledi. Atalǵan zattar qylmystyq is materıaldaryna aıǵaq zat retinde tirkeldi.
Atalǵan derek boıynsha bopsalaý babyna sáıkes sotqa deıingi tergep-tekserý amaldary bastaldy. Polıtsııa azamattardy eger qandaı da bir bopsalaý, qorqytý nemese qysym kórsetý faktilerine tap bolsańyz nemese kýá bolsańyz, quqyq qorǵaý organdaryna dereý habarlaýǵa shaqyrady.
Buǵan deıin habarlaǵanymyzdaı, Ekibastuzda alaıaqtyq áreketterge qatysqan eki jasóspirim ustaldy.