Aqtóbe oblysynda hromdy tereń óńdeıtin óndiristik keshen salynady
AQTÓBE. KAZINFORM – Aqtóbe oblysynda hromdy tereń óńdeýge baǵyttalǵan iri ınvestıtsııalyq jobany iske asyrý josparlanyp otyr. Joba aıasynda shıkizat tyńaıtqyshtar, hımııalyq ónimder, metallýrgııalyq komponentter jáne bıologııalyq belsendi qospalar óndirýge qaıta óńdeletin bolady. Bul týraly «KAZAKH INVEST» ulttyq kompanııasynyń baspasóz qyzmeti habarlady.
Atalǵan bastama Aqtóbe oblysy ákimdiginiń suranysy boıynsha «ınvestıtsııaǵa tapsyrys» tetigi sheńberinde júzege asyrylyp jatyr. Óńirdiń resýrstyq áleýeti men tolyqqandy ónerkásiptik klaster qalyptastyrý múmkindikterin eskere otyryp júrgizilgen júıeli taldaý nátıjesinde hrom jáne hımııa-metallýrgııa salalary óńirdiń basym baǵyttary retinde aıqyndaldy.
KAZAKH INVEST álemdik deńgeıdegi jetekshi kompanııalarmen kelissózder júrgizip, onyń nátıjesinde Qazaqstan delegatsııasynyń hrom óńdeý salasyndaǵy jahandyq naryqtyń iri oıynshylarynyń biri – Sichuan YinHe Chemical Co. Ltd. kompanııasynyń óndiristik alańdaryna sapary uıymdastyryldy.
Іssapar qorytyndysy boıynsha taraptar ınvestıtsııalyq jobany birlesip iske asyrýǵa ózara múddeliligin rastady jáne tıisti kelisimge qol qoıdy.
Joba aıasynda jylyna 200 myń tonnaǵa deıin ónim óndiretin, ekologııalyq taza ári qaldyqsyz ozyq tehnologııalardy qoldanatyn óndiristik keshen salý josparlanyp otyr.
Boljam boıynsha, jyl saıyn óndiriletin ónim kólemi 1 mlrd AQSh dollaryna jetedi, al jekelegen ónim túrleriniń quny bir tonnasyna 300 myń AQSh dollaryna deıin barýy múmkin. Jobanyń jalpy ınvestıtsııa kólemi shamamen 500 mln AQSh dollary jáne 600-den astam jańa jumys ornyn qurýǵa múmkindik beredi.