Aqtóbe oblysynda deltaplan apatqa ushyrap, ushqysh mert boldy
AQTÓBE. KAZINFORM — Aqtóbe oblysynyń Muǵaljar aýdany Jaryq aýylynyń mańynda óndiristik jumysty oryndaý barysynda «Samǵaý AGRO» JShS tıesili deltaplan ushý apparaty apatqa ushyrady.
Azamattyq avıatsııa komıtetiniń málimetinshe, deltaplan ushqyshy qaza tapqan.
«Bul oqıǵa boıynsha QR Kólik mınıstrligi avıatsııalyq oqıǵany tergep-tekserý jónindegi komıssııa qurdy. Kóliktegi oqıǵalar men oqys oqıǵalardy tergep-tekserý departamentiniń qyzmetkerleri avıatsııalyq oqıǵa ornyna jiberildi» deıdi komıtetten.
Sondaı-aq keshe, 21 maýsymda Qyzylorda oblysy Jalaǵash aýdany Mádenıet aýylynyń mańynda ushý barysynda «Samǵaý AGRO» JShS tıesili An-2 áýe kemesi jerge qatty ekpinmen qonǵan.
Bortta eki adamnan turatyn ekıpaj músheleri boldy. Zardap shekkender joq.
Avıatsııalyq oqıǵalardy tergeý jónindegi qaǵıdaǵa sáıkes bul oqıǵa da avıatsııalyq apat retinde qaralady.
