Aqtóbe oblysynda bastalǵan pılottyq joba endi ózge óńirlerde júzege asyrylady
AQTÓBE. KAZINFORM – Pılottyq joba «Aqtóbe oblysyndaǵy shaǵyn jınaqty aýyl mektepteriniń áleýetin tsıfrly tehnologııalar arqyly damytý» dep atalady. Óńirde byltyr bastaý aldy.
Aqtóbede aýyldardaǵy shaǵyn jınaqty mektepterdi damytýǵa baǵyttalǵanpılottyq jobanyń qorytyndysy boıynsha respýblıkalyq semınar ótti. Oǵan QR Premer-mınıstriniń orynbasary Tamara Dúısenova, Aqtóbe oblysynyń ákimi Ashat Shaharov, «Qazaqstan halqyna» qory Basqarma tóraǵasynyń orynbasary Lázzat Shyńǵysbaeva jáne Bilim berý salasyn turaqty damytý qory Qamqorshylyq keńesi tóraıymy, Qazaqstannyń eńbek sińirgen ustazy Kúlásh Shámshıdınova qatysty.
Semınardyń moderatory retinde sóz alǵan aımaq basshysy Ashat Shaharov pılottyq jobanyń tıimdiligin atap ótti.
«Memleket basshysy Qasym-Jomart Toqaev bilim salasyna árdaıym qoldaý kórsetip, onyń damýyna serpin beretin naqty mindetterdi júktedi. Búgingi semınar – Prezıdent tapsyrmasyna sáıkes, Qazaqstannyń bilim berý júıesin jańa deńgeıge kóterýge baǵyttalǵan mańyzdy qadamdardyń biri. Byltyr Aqtóbe oblysynda júzege asyrylǵan «Tsıfrlyq tehnologııalardy paıdalana otyryp, Aqtóbe oblysynyń shaǵyn jınaqty aýyldyq mektepteriniń áleýetin damytý» jobasy bilim berý sapasy men oqytý tıimdiligin arttyrdy. 2023 jylmen salystyrǵanda, aýyl mektepteriniń bilim sapasy ortasha eseppen 7%-ǵa artty. Oblysta bilim berýdiń tsıfrlyq ekojúıesi qalyptasty. Shaǵyn jınaqty aýyl mektepterin qoldaý maqsatynda elimizde alǵash ret qolǵa alynǵan teńdesi joq iri joba úshin eńbek etken barlyq azamattarǵa rızashylyǵymdy bildiremin», - dedi oblys ákimi.
Óz sózinde vıtse-premer Tamara Dúısenova pılottyq jobanyń nátıjelerin joǵary baǵalap, ony ózge óńirlerdiń de tájirıbesine engizý kerektigin sóz etti.
«Bul jobany keńeıte túsý kerek. Birinshiden, shaǵyn jınaqty mektepter kóp aımaqtarda kóbirek iske asyrý kerek. Bizdiń basty maqsatymyz – barlyq balaǵa sapaly bilim berý», - dep atap ótti Tamara Dúısenova.
Bir jyl kóleminde oblys ákimdigimen birge, quzyrly mınıstrlik, Bilim berý salasyn turaqty damytý qory men «Qazaqstan halqyna» qory atalǵan jobanyń júzege asýyna atsalysty.
Jobany júzege asyrýdyń nátıjesinde oǵan qatysqan 134 mekteptiń 113-i ámbebap kabınettermen, qalǵany – jaratylystaný jáne tsıfrlyq kabınettermen jabdyqtaldy. Qarjy «Qazaqstan halqyna» qorynan bólinip jatyr. Bul mektepterde bilim berýdiń 4 tsıfrly formaty testileýden ótkizildi. ıAǵnı, bilim berý mekemeleri aýdan ortalyqtaryndaǵy tirek mekteptermen baılanys ornatyp, pedagogter de strımıngti oqytýdyń tsıfrlyq sheshimderin paıdalandy.
Sonyń nátıjesinde, birinshiden oqý jylynyń basynda jáne aıaǵynda FURO men Nazarbaev zııatkerlik mektepteri ótkizgen monıtorıng pánderdiń barlyǵynan derlik damý bar ekenin kórsetti. Ekinshiden, pılottyq jobada tirek mekteptermen tikeleı baılanysta bolyp, ustazdarynan bilim alǵan shaǵyn jınaqty mektepterdiń kórsetkishi basqa oqytý formalarynan joǵary nátıje kórsetti. Úshinshiden, jergilikti atqarýshy bılik ókilderiniń kúshimen mektepterdiń 77,4%-nda ınternet máselesi ońtaıly sheshildi.
Budan bólek, pılottyq joba shaǵyn jınaqty mektepterde pedagog mamandardyń tapshylyǵy máselesin sheshýge bolatynyn kórsetti. Ol úshin tirek mekteptermen tyǵyz baılanys ornatyp, tsıfrlyq platformalarmen jumysty kúsheıtý kerek. Bul rette, jergilikti bilim basqarmasynyń jumysyn atap ótken jón. Oblystyq metodıkalyq ortalyq oqytýdyń sabaq kestesin mektepter arasynda úılestirip qana qoımaı, 12 myńnan artyq onlaın sabaqty baqylap, pedagogtermen keri baılanys ornatty.
«Aqtóbe oblysy – tirek jáne magnıt mektepterdiń keshendi jumysy tolyq iske asqan elimizdegi alǵashqy aımaq. Jobamyzdyń nátıjesi shalǵaı aımaqtardaǵy sapaly kadr jetispeýshiligin tirek mektep ustazdary men tsıfrly tehnologııalar arqyly sheshýge bolatynyn kórsettik», - dedi Bilim berý salasyn turaqty damytý qorynyń dırektory Danııar Toqtarbaev.
Taǵy bir aıtyp óterligi, pılottyq joba aıasynda metodıkalyq usynystar, analıtıkalyq materıaldar, zańnamalyq aktilerge engiziletin ózgerister usynyldy. Semınarǵa qatysqan jobanyń seriktesteri aldaǵy ýaqytta ózge aımaqtarǵa jobanyń uıymdastyrý men oryndaý ádisterin bólisýge daıyn ekenin jetkizdi.
