Aqtóbe oblysynda aýdan ákiminiń orynbasary sottaldy
QARAǴANDY. KAZINFORM — Aqtóbe oblysynda Shalqar aýdandyq soty bıyl 23 sáýirde aýdan ákiminiń orynbasary B.Zaırymbet pen aýdandyq turǵyn úı-kommýnaldyq sharýashylyq bóliminiń basshysy A.Berkimbaevǵa qatysty úkim shyǵardy.
Sybaılas jemqorlyqqa qarsy is-qımyl agenttiginiń málimetinshe, 2024 jylǵy 27 jeltoqsanda olardyń birigip, kommertsııalyq uıym basshysynan 2,3 mıllıon teńge kóleminde para alǵany anyqtaldy.
Para memlekettik satyp alý aıasynda oryndalǵan jumystardyń aktilerine kedergisiz qol qoıý, tólem júrgizý jáne jalpy qamqorlyq kórsetý úshin berilgen. Sot atalǵan laýazymdy tulǵalardy para alǵany úshin kináli dep tanyp, árqaısysyna memlekettik qyzmette, sýdıa jáne jergilikti ózin-ózi basqarý organdarynda laýazym atqarý quqyǵynan ómir boıyna aıyra otyryp, 6 jylǵa bas bostandyǵynan aıyrý jazasyn taǵaıyndady.
Sot úkimi zańdy kúshine engen joq. Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodekstiń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi.
Aıta keteıik, Atyraýda sport basqarmasynyń burynǵy basshysy 4, jattyqtyrýshy 3 jylǵa sottaldy.